Májiliste salyqqa qatysty ózgerister engiziletin zań jobasynyń tanystyrylymy boldy
ASTANA. 13 qańtar. QazAqparat /Qanat Mámetqazyuly/ - Búgin QR Parlamenti Májilisinde «Keıbir zańnamalyq aktilerine salyq salý máseleleri boıynsha ózgerister men tolytyrýlar engizý týraly» zań jobasynyń tanystyrylymy boldy.
Zań jobasynyń negizgi maqsaty - birinshiden, qoldanystaǵy zańnamalarǵa halyqaralyq salyq salý máseleleri jónindegi ózgeristerdi engizý. Ekinshiden, qoldanylýy aıasynda týyndaǵan Salyq kodeksiniń jekelegen erejelerin naqtylaýǵa baǵyttalǵan ózgerister bolyp otyr. Bul rette zań jobasymen rezıdent emesterdiń turaqty mekemeleriniń qalyptasý ólshemderi naqtylanady. Bundaǵy nazar aýdarylatyn másele, rezıdent emestiń turaqty mekemesin tirkeý tártibi reglamentteledi. Budan bólek, rezıdent emesterdiń jekelegen tabystaryna qatysty salyq salý tártipteri naqtylanady.
«Salyq kodeksin tájirıbede qoldaný nátıjeleri boıynsha onyń jekelegen erejelerin naqtylaý, reglamentteý jáne basqa zańnamalyq aktilermen sáıkes keltirý qajettigi týyndady. Boljanatyn ózgerister men tolyqtyrýlar naqtylaýshy sıpatta jáne Salyq kodeksiniń jalpy tujyrymdamasyn ózgertpeıdi. Atap aıtqanda, arnaıy ekonomıkalyq aımaqtyń aýmaǵynda salyq rásimderin odan ári jeńildetý jáne salyq rejimin jaqsartý maqsatynda korporatıvtik tabys salyǵy boıynsha avanstyq tólemderdiń esebin berý mindetinen bosatý kózdelip otyr», - deıdi zań jobasy boıynsha baıandaǵan depýtat Sansyzbaı Esilov.
