Májiliste salyq mindetterin sheshýge arnalǵan zań jobasy birinshi oqylymda maquldandy

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine salyq salý jáne ınvestıtsııalyq ahýaldy jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasynyń mańyzdy baǵyttary retinde salyq júıesin reformalaý, salyqtyq jáne kedendik ákimshilendirýdi jetildirý, ınvestıtsııalar tartýdy yntalandyrý, bıznes-ortany damytý, tarıftik saıasatty jáne monopolııaǵa qarsy retteýdi jetildirý jáne basqa shalar eskerilgen.

«Júrgizilgen tsıfrlandyrý men júıelerdi jańǵyrtýdy eskere otyryp, qoldanystaǵy rásimder qaıta qaraldy. Memlekettik qyzmetter boıynsha elektrondyq formatqa aýystyrý, olardy kórsetý merzimderin qysqartý, jeke praktıkamen aınalysatyn tulǵalardyń qyzmetin toqtatý rásimin ońtaılandyrý usynylady. Salyq eseptiligin tapsyrý múmkindigi keńeıtilip, endi ony bir rettik paroldi paıdalaný arqyly usynýǵa bolady», - dedi Ulttyq ekonomıka mınıstri Rýslan Dálenov.

Budan buryn habarlanǵandaı, salyq elementterin (salyq salý obektisi, salyq bazasy, mólsherlemesin, esepteý jáne tóleý tártibin) ózgertpeı jeke tulǵalardyń múlik jáne jer salyqtaryn biriktirý usynylady, 2 salyq biryńǵaı tólemmen tólenedi.

Bul rette, kóppáterli turǵyn úılerdiń ıeleri úshin jer salyǵyn alyp tastaý usynylady.

R.Dálenovtyń sózine qaraǵanda, salyq tóleýshilerge qolaıly bolý maqsatynda kólik salyǵyn tóleý merzimin bıylǵy 31 jeltoqsanynan kelesi jyldyń 1 sáýirine aýystyrý usynylyp otyr.

Budan bólek, turaqty áleýmettik mańyzy bar avtomobıl tasymaldary boıynsha qosylǵan qun salyǵynan 3 jylǵa bosatý eskerilip otyr.

«5G jańa baılanys túrin qurýǵa ınvestıtsııalar tartý jáne jasandy ıntellektini damytý maqsatynda radıojıilik spektrin paıdalanǵany úshin tólemaqy mólsherlemelerin 5 jyl merzimine 10 esege deıin tómendetý usynylady», - dedi Rýslan Dálenov.