Májiliste ruqsat berý júıesin jetildirýge baǵyttalǵan zań jobasy tanystyryldy
ASTANA. Qyrkúıektiń 14-i. QazAqparat /Qanat Mámetqazyuly/ -Búgin QR Parlamenti Májilisinde «QR keıbir zańnamalyq aktilerine ruqsat berý júıesin jetildirý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
Atalǵan zań jobasy ruqsat berý salasyndaǵy zańnamany odan ári jetildirýge arnalyp otyr. Esterińizge sala keteıik, Memleket basshysy joldaýlarynda Úkimetke ákimshilik reforma sheńberinde bızneske túsetin ákimshilik júktemeni batyl azaıtý, ruqsat berý júıesin, eń aldymen lıtsenzııalaýdy, sertıfıkattaýdy, akkredıtteýdi odan ári ońaılatýdy tapsyrǵan bolatyn. Osy maqsatty júzege asyrý úshin atalǵan zań jobasy ázirlengen.
Jıyn barysynda zań jobasynda qamtylǵan negizgi jańalyqtarǵa toqtalǵan Ekonomıkalyq damý jáne saýda vıtse-mınıstri Murat Qusaıynov, qujatta usynylǵan ózgertýlerdiń basym bóligi lıtsenzııalaý-ruqsat berý júıesin reformalaýdyń kezekti satysyn qamtıtynyn atap ótti. Vıtse-mınıstrdiń aıtýynsha, ázirlengen zań jobasy tek lıtsenzııalaý salasyna ǵana emes, sonymen birge memlekettik organdar tarapynan júzege asyrylatyn ruqsat berý úderisiniń barlyq túrlerine baǵyttalyp otyr. «Bul reformalaýdyń osy kezeńdegi negizgi erekshelik bolyp tabylady. Sonymen birge, zań jobasy boıynsha ruqsat berý úderisterin qysqartatyn jáne jeńildete túsetin 6 kodeks pen 41 zańǵa ózgerister engizý kózdeledi. Atap aıtqanda, ruqsat berý qujattarynyń sany aıtarlyqtaı qysqartý kózdelip otyr», dedi M. Qusaıynov. Vıtse-mınıstrdiń sózine qaraǵanda, zań jobasy arqyly qazirgi kúngi qoldanystaǵy 1 myń 15 ruqsat berý qujattarynyń 331-i qysqartylady. Zań jobasyn engizý bolashaqta 1 jylda jergilikti bıýdjet kirisiniń orta eseppen
300 mıllıon teńgege qysqarýyna alyp keletini boljanady.
