Májiliste ruqsat berý qujattaryn qysqartýǵa baǵyttalǵan zań jobasy qaralatyn bolady
ASTANA. QazAqparat - Búgin Májilis Spıkeri Qabıbolla Jaqypovtyń tóraǵalyǵymen Májilis Bıýrosy ótti. Onda aldaǵy jalpy otyrystyń kún tártibi naqtylandy. Bul týraly tómengi palatanyń baspasóz qyzmetinen habarlandy.
Bıýro usynysyna sáıkes, halyq qalaýlylary ruqsat berý qujattaryn qysqartý jáne ruqsat berý rásimderin ońaılatý máseleleri boıynsha túzetýlerge qatysty zań jobasyn birinshi oqylymda qaraıtyn bolady. Sonymen qatar, osy kúni Májiliste 2003 jylǵy 25 jeltoqsanda Astana qalasynda qol qoıylǵan Qyrǵyzstanmen memlekettik shekara arqyly ótkizý pýnktteri týraly kelisimge ózgeristi engizý týraly úkimetaralyq hattamany jáne bilim berý salasyndaǵy kemsitýshilikke qarsy kúres týraly konventsııany ratıfıkatsııalaýǵa qatysty zań jobalary talqylanbaq.
Jalpy otyrysta depýtattar birqatar ratıfıkatsııalyq qujattar boıynsha beıindi komıtetterge qorytyndy ázirleý merzimin belgileıdi. Atap aıtqanda, Reseımen 1996 jylǵy 18 qazandaǵy Qazaqstan Respýblıkasynyń Úkimeti men Reseı Federatsııasy Úkimetiniń arasyndaǵy Saryshaǵan synaq polıgonyn sondaı-aq, Qazaqstan aýmaǵyna ornalasqan Reseı Federatsııasynyń 929 Memlekettik ushý-synaq ortalyǵynyń obektileri men jaýyngerlik alańdaryn jaldaý týraly sharttarǵa ózgerister engizý týraly úkimetaralyq hattamalardy, sonymen qatar, Qazaqstan men Reseı arasyndaǵy 1995 jylǵy 20 qańtardaǵy Reseı Federatsııasy Qorǵanys mınıstrliginiń (obektileri men urys alańdary Qazaqstan Respýblıkasynyń aýmaǵynda ornalasqan) 929 Memlekettik ushý-synaq ortalyǵyn paıdalaný tártibi týraly jáne Saryshaǵan synaq polıgonyn paıdalaný men jalǵa berý sharttary jáne Prıozersk qalasynyń tirshilik áreketin qamtamasyz etý týraly kelisimderge túzetýlerge qatysty hattamalarǵa baılanysty bolyp otyr.
