Májiliste oıyn bıznesi máselelerine arnalǵan zań jobasy birinshi oqylymda maquldandy
Zań jobasy Qazaqstan Respýblıkasynyń oıyn bıznesi salasyndaǵy qoldanystaǵy zańnamasynyń normalaryndaǵy olqylyqtardy joıý, sondaı-aq zańnamalyq shekteýlerdi aınalyp ótýge múmkindik beretin erejelerdi alyp tastaý jolymen jetildirý maqsatynda ázirlendi. Qujat býkmekerlik keńseler men totalızatorlardyń qyzmetin retteý men baqylaýdy jetildirýge, qumar oıyndar men bás tigýge tartylatyn jáne táýeldi azamattardyń sanyn qysqartýǵa baǵyttalǵan.
«Zań jobasynyń jumysyna múddeli memlekettik organdardyń ókilderi jáne mınıstrlikte qurylǵan jumys toby aıasyndaǵy qoǵamdyq uıymdardan sarapshylar qatysty. «Oıyn bıznesi týraly» zańda: qumar oıyndar men bás tigýge qatysýdan ózin-ózi shekteý tetigi engiziledi.
Ýákiletti memlekettik organdardy býkmekerlik keńseler men oıynshylardyń arasyndaǵy aqsha operatsııalary týraly tolyq jáne durys aqparatpen qamtamasyz etý úshin, sondaı-aq bás tigýge qatysýdan shekteý tetigin iske asyrý úshin stavkalardy esepke alý ortalyǵyn qurý kózdeledi», - dedi Mədenıet jəne sport mınıstri Aqtoty Raıymqulova.
Bul rette stavkalardy esepke alý ortalyǵynda býkmekerlik keńsege qolma-qol nemese elektrondyq tólem júıeleri arqyly túsetin barlyq tólemder eskerilýi tıis.
Býkmekerlik keńseler men totalızatorlarǵa túsetin barlyq tólemderdiń biryńǵaı esebi kóleńkeli aınalymdy boldyrmaýǵa, salyqtardyń jınalýyn arttyrýǵa, baqylaýdy jeńildetýge múmkindik beredi.
Budan bólek, Qazaqstanda býkmekerlik keńseler tek sporttyq oqıǵalarǵa stavkalar qabyldaýǵa mindetteledi.
«Oqıǵanyń nátıjesindegi ashyqtyqty jáne oıynshylardyń quqyqtaryn qamtamasyz etý maqsatynda býkmekerlik keńselerge tek sporttyq oqıǵalarǵa stavkalar qabyldaý mindetin belgileý usynylady», - dedi vedomstvo basshysy.
Aıta keteıik, Parlament Májilisinde zań jobasy jumys tobynyń 12 otyrysynda talqylandy, onda depýtattar 150-den astam túzetýler engizip, onyń mazmunyn jaqsartty.
«Zań jobasyn qabyldaý zańnamadaǵy olqylyqtardy joıýǵa, qumar oıyndar men bás tigýge qatysýshylardyń quqyqtarynyń kepildigin qamtamasyz etýge, sondaı-aq bıýdjetke túsetin túsimderdi arttyrýǵa múmkindik beredi», - dep naqtylady mınıstr.
