Májiliste otbasy úlgisindegi balalar aýyly jáne jasóspirimder úıleri máseleleri boıynsha ózgerister men tolyqtyrýlar engizýge qatysty zań jobasy tanystyryldy
ASTANA. Aqpannyń 25-i. QazAqparat /Aıdar Ospanalıev/ - Búgin Parlament Májilisinde «Qazaqstan Respýblıkasynyń keıbir zańnamalyq aktilerine otbasy úlgisindegi balalar aýyly jáne jasóspirimder úıleri máseleleri boıynsha ózgerister men tolyqtyrýlar engizý týraly» zań jobasynyń tanystyrylymy boldy,
dep habarlaıdy QazAqparat.
Bilim jáne ǵylym mınıstrliginiń jaýapty hatshysy Farhad Qýanǵanovtyń aıtýynsha, «Otbasy úlgisindegi balalar aýyly jáne jasóspirimder úıleri týraly» zań 2000 jyly qabyldanǵan. Atalmysh zań talaptary boıynsha elimizdegi otbasylyq úlgidegi balalar aýyldary salynyp, olardyń quqyqtyq múmkindikteri anyqtaldy. Atalmysh oryndarda negizinen jetim jáne ata-ananyń qamqorlyǵynsyz qalǵan balalar ómir súredi jáne onda olarǵa oqyp, bilim alyp, jan-jaqty azamat bolyp ósýlerine barlyq jaǵdaılar jasalǵan. «Qazirgi tańda respýblıkada otbasylyq negizdegi 6 aýyl
men 3 jekemenshiktegi jáne SOS balalar aýyldary bar. Onda ata-anasynyń qamqorlyǵynan aıyrylǵan 610 bala tárbıelenýde. Sonymen qatar elde 27 jasóspirimder úıleri jumys isteıdi. Onda 1 myń 323 bala bar. Qoldanystaǵy zań talaptary boıynsha balalar úılerin tek balalar úıleriniń janynda jáne otbasylyq úlgidegi balalar aýyldarynan ǵana ashýǵa bolady», dedi jaýapty hatshy.
Onyń aıtýynsha, qoldanystaǵy zańǵa engiziletin ózgerister men tolyqtyrýlar jasóspirimder úıleriniń mártebesin zań júzinde belgilep, olardyń ári qaraıǵy qyzmet tártibin retteıdi. «Sonymen qatar, qujat jasóspirimder úılerin tek balalar úıleriniń janynan ǵana emes jetim balalarǵa arnalǵan mektep-ınternattardan da ashýǵa mmkindik beredi. Zańda mundaı oryndardyń ózin-ózi qamtamasyz etetin mekeme retinde de ashý múmkindikteri qarastyrylǵan. Qujat «Qazaqstan Respýblıkasyndaǵy balalardyń quqyqtary týraly» zańnyń 30-shy babyna ózgeris engizýdi qarastyrady. Bul ózgeris qosymsha qarjyny qajet etpeıdi», dedi F.Qýanǵanov.
