Májiliste «Órt qaýipsizdigi týraly» zań jobasy tanystyryldy
ASTANA. Qarashanyń 18-i. QazAqparat - Májiliste «Órt qaýipsizdigi týraly» zańǵa Qazaqstan Respýblıkasynda órt qaýipsizdigi salasyndaǵy qaterlerdi táýelsiz baǵalaý júıesin qurý boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
Bul sharany osy Palatanyń Ekologııa máseleleri jáne tabıǵat paıdalaný komıteti uıymdastyrdy, dep habarlaıdy QazAqparat.
Qazaqstan Respýblıkasynda órt qaýipsizdigi salasyndaǵy qaýip-qaterlerdi táýelsiz baǵalaý júıesin qurý tujyrymdamasyna sáıkes ázirlengen zań jobasy boıynsha QR Tótenshe jaǵdaılar mınıstriniń orynbasary Valerıı Petrov baıandama jasady.
Qazaqstanda 92 myń jeke kásipkerlik sýbektilerinde memlekettik órt baqylaý júzege asyrylady jáne baqylaýdaǵy nysandardyń sany jyl saıyn artyp otyr. Bul rette memlekettik ınspektorlardyń sany sońǵy bes jylda ózgerissiz qalýda jáne myń adamnan aspaıdy. Sóıtip, qazirgi ýaqytta bir ınspektorǵa 90-nan astam obektiden kelip otyr, eldi mekenderdegi nysandarǵa deıingi ara qashyqtyq shamamen 100-300 shaqyrymdy quraıdy.
Tótenshe jaǵdaılar mınıstrligi órt qaýipsizdigi salasyndaǵy baqylaýdy josparlaý men júzege asyrýdyń sońǵy úlgidegi ádisterin engizý boıynsha josparly jumystar atqarýda.
Táýelsiz baǵalaýdy qurý turǵyndardy, zańdy tulǵalar men jeke kásipkerlerdiń múlkin, olardyń qaýipsizdiginiń jaı-kúıin baǵalaý salasyna memlekettik baqylaý organdarymen qatar táýelsiz saraptama uıymdaryn qosý arqyly qorǵaý deńgeıin arttyrýǵa, memlekettik órt baqylaýǵa balama qurýǵa, sondaı-aq baqylaý qyzmetiniń nysandary men ádisterin ózgertýge ákeledi.
Órt qaýipsizdigi salasyndaǵy qaterlerdi táýelsiz baǵalaý júıesin qurý kózdelip otyr. Sonymen qatar, «Órt qaýipsizdigi týraly» Zańdy 25-1 jáne 25-2-baptardan turatyn 5-1-taraýmen tolyqtyrý usynyldy.
«Órt qaýipsizdigi salasyndaǵy qaýip-qaterlerdi táýelsiz baǵalaýdy júrgizý tártibi» degen 25-1-bapta baǵalaý júrgizý úshin negizder anyqtalady. Onda táýelsiz baǵalaý, sondaı-aq saraptamalyq baǵalaý qorytyndysynyń qoldanylý merzimi qamtylady.
Uıymdardy akkredıtteýdi órt qaýipsizdigi salasyndaǵy ýákiletti organ júzege asyrady.
Óziniń shtatynda joǵary arnaıy órt-tehnıkalyq bilimi nemese memlekettik jáne (nemese) memlekettik emes órtke qarsy qyzmetterde keminde bes jyl jumys ótili men joǵary tehnıkalyq bilimi bar, arnaıy oqytý kýrstarynan ótken keminde úsh mamany bar uıymdar órt qaýipsizdigi salasyndaǵy qaýip-qaterlerdi táýelsiz baǵalaý jónindegi saraptaý uıymdary bola alady dep anyqtalǵan.
Zań jobasynda turaqty jumys isteıtin komıssııanyń akkredıtteý týraly materıaldardy qaraýy jáne olar boıynsha sheshim qabyldaýy kózdelgen.
Osy zań jobasy boıynsha qurylǵan jumys tobyna depýtat Aleksandr Mılıýtın jetekshilik jasaıdy.
