Májiliste orman sharýashylyǵy, janýarlar dúnıesi men erekshe qorǵalatyn tabıǵı aýmaqtar máselelerine arnalǵan zań jobasynyń tanystyrylymy boldy
ASTANA. 23 qarasha. QazAqparat /Qanat Mámetqazyuly/ - Búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine orman sharýashylyǵy, janýarlar dúnıesi jáne erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
Atalǵan zań jobasyn qabyldaý orman sharýashylyǵyn, erekshe qorǵalatyn tabıǵı aýmaqtardy damytýǵa jáne janýarlar dúnıesin qorǵaýdy, ósimin molaıtýdy jáne paıdalanýdy jaqsartýǵa járdemdesetin bolady. Bul rette zańsyz ań aýlaýǵa, aǵashtar men butalardy zańsyz kesýge, sırek kezdesetin jáne joıylý qaýpi tóngen janýarlar men ósimdikter túrlerimen zańsyz áreket jasaýǵa baılanysty qylmystarǵa neǵurlym tıimdi túrde qarsy turý maqsatynda Qylmystyq kodekske túzetýler engizý usynylady.
«Zań jobasyn qabyldaýdaǵy maqsat, birinshiden, orman sharýashylyǵy, janýarlar dúnıesi jáne erekshe qorǵalatyn tabıǵı aýmaqtar salasyndaǵy zańdardy osy zamanǵy áleýmettik jáne ekonomıkalyq jaǵdaılarmen sáıkestendirý. Ekinshiden, kórsetilgen salalarda quqyqtyq qatynastardy odan ári jetildirý.Úshinshiden, sybaılas jemqorlyq sıpatyndaǵy tártip buzýshylyqtar týǵyzýy múmkin quqyqtyq normalardy joıý. Tórtinshiden, qoǵamdyq qatynastardyń ortaq nysanyna - bıologııalyq ártúrlilikti saqtaý jáne paıdalaný nysanyna ıe úsh zańnyń normalary arasynda dál úılesimdilikke qol jetkizý bolyp tabylady», - dedi qujat boıynsha baıandaǵan QR Aýyl sharýashylyǵy vıtse-mınıstri Marat Orazaev.
Onyń aıtýynsha, Qylmystyq kodekske jáne Qazaqstan Respýblıkasynyń Ákimshilik quqyq buzýshylyq týraly kodeksine engiziletin túzetýler osy saladaǵy tıimdilikti arttyrýǵa baǵyttalyp otyr. Atap aıtqanda, qylmystyq áreketter obektisi, qylmys jasaý qarýy nemese quraly bolyp tabylatyn múlikti mindetti túrde tárkileý kózdeledi.
