Májiliste Oral Muhamedjanovty eske aldy
ASTANA. QazAqparat - Búgin Májiliste memleket jáne qoǵam qaıratkeri, palatanyń III-V shaqyrylym depýtaty, III jáne IV shaqyrylymdarda Májilis tóraǵasy bolǵan Oral Muhamedjanovty eske alý konferentsııasy ótti, dep habarlaıdy QazAqparat.
O. Muhamedjanovtyń týǵanyna 70 jyl tolýyna oraı uıymdastyrylǵan sharaǵa Májilis tóraǵasy Nurlan Nyǵmatýlın, Parlament depýtattary, qoǵam qaıratkerleri men O. Muhamedjanovtyń otbasy, týǵan-týystary jáne jaqyndary qatysty.
«Oral Baıǵonysuly eńbek qyzmetin týǵan jeri - Qostanaı oblysynan bastap, ómiriniń sońyna deıin elim dep, jerim dep eńbek etti. Qazaqstanymyz egemendik alǵan birinshi kúnnen bastap, Elbasy Nursultan Ábishuly Nazarbaevtyń qasynda boldy. Prezıdentimizdiń saıasatyn árqashan qoldap, elimizdiń damýyna úlken úles qosqan azamat edi. Memleket basshysynyń barlyq bastamalaryna belsene aralasyp, qaı jerde, qandaı qyzmet atqarsa da, iskerligimen, jaýapkershiligimen, adamgershiligi jáne parasattylyq qasıetterimen tanyldy. Árqashanda abyroıy joǵary, bedeli bıik boldy», - dedi konferentsııany ashqan N. Nyǵmatýlın.
Májilis tóraǵasy, sondaı-aq Oral Muhamedjanov jan-jaqty qabileti zor, maqsatqa berik, qyzmetke adal bolǵanyn aıta kele, onyń esimi elimiz tarıhynda, sonyń ishinde Májilis tarıhynda máńgilik saqtalatynyn atap ótti.
Odan ári, Oral Muhamedjanovpen birge jumys istegen áriptesteri men dostarynyń estelikteri, ómiriniń jarqyn sátterin beıneleıtin kóptegen fotosýretter onyń joǵary adamgershilik jáne kásibı qasıetterin eske saldy.
Muhamedjanov ómiriniń mańyzdy bóligin memlekettik qyzmetke arnady. Kóptegen máselelerdi sheshýge kelgende óziniń shynaıy patrıottyǵy men joǵary azamattyq kózqarasyn tanytyp keldi. Eńbek jolyn Qostanaı oblysynda bastady. Prezıdent Ákimshiliginde jumys istep, Qazaqstannyń Qaýipsizdik Keńesiniń múshesi boldy. Májilis depýtaty jáne palata tóraǵasy retinde qazaqstandyq parlamentarızmniń damýyna eleýli úles qosyp, tıimdi zań shyǵarýshylyq qyzmetiniń nátıjesinde elimizdiń turaqty damýynyń berik negizin qalady.
***
Oral Baıǵonysuly Muhamedjanov(11.11.1948 - 15.10.2013) - Qazaqstannyń memlekettik jáne saıası qaıratkeri. Májilistiń III-V shaqyrylym depýtaty, III jáne IV shaqyrylymdarda Májilis tóraǵasy. «Qurmet», «Parasat», Dostyq (RF), «Sodrýjestvo» (TMD PAA) ordenderimen marapattalǵan.
