Májiliste ónerkásiptik saıasat týraly zań jobasy tanystyryldy
Zań jobalary Memleket basshysynyń 2020 jylǵy 1 qyrkúıektegi Qazaqstan halqyna Joldaýyn iske asyrý jónindegi Jalpyulttyq is-sharalar josparynyń 12-tarmaǵyn oryndaý maqsatynda ázirlendi. Zań jobasynyń maqsaty - qazirgi zamanǵy ónimdiligi joǵary, básekege qabiletti, eksportqa baǵdarlanǵan ónerkásipti jedel damytý arqyly ulttyq ekonomıkanyń básekege qabilettiligin arttyrý.
Zań jobasy negizgi mindetter retinde mynany aıqyndaıdy:
1) qolaıly ındýstrııalyq ortany qamtamasyz etý;
2) básekege qabiletti óndiristerdi damytý;
3) ınnovatsııalardy tıimdi engizý;
4) ónerkásipte el ishindegi qundylyqty damytý;
5) ónerkásip salasyndaǵy qyzmet sýbektileriniń ınvestıtsııalyq tartymdylyǵyn jáne eksporttyq áleýetin arttyrý.
QR Indýstrııa jáne ınfraqurylymdyq damý vıtse-mınıstri Amanııaz Erjanovtyń aıtýynsha, «Ónerkásiptik saıasat týraly» zań jobasynyń sıpattamasy bes bólimnen turady.
«Tıimdi zańnamalyq retteý maqsatynda 1-bólimde ónerkásiptik damýdy qamtamasyz etý úshin 26 uǵym men anyqtama kózdeledi. Olardyń ishinde ónerkásip, ónerkásiptik saıasat, ónerkásip salasyndaǵy sýbektiler, el ishindegi qundylyq, óńdeý ónerkásibi, ónerkásiptik ónim jáne basqa da túıindi máseleler bar. Zań jobasyndaǵy jańashyldyqtyń biri - ındýstrııalyq klımat uǵymyn engiziledi. Onyń aıasynda ekonomıkalyq, ákimshilik, quqyqtyq, ınstıtýtsıonaldyq jáne ózge de básekege qabiletti óndiristerdi qurý jáne keńeıtý jónindegi jaǵdaılar men derekter baǵalanady», - dedi vıtse-mınıstr.
Onyń sózine qaraǵanda, ındýstrııalyq klımattyń jaı-kúıine monıtorıngti QR Indýstrııa jáne ınfraqurylymdyq damý mınıstrligi júzege asyrady. Onyń nátıjeleri bolashaqta ónerkásiptik saıasatty qalyptastyrý kezinde eskeriledi. Monıtorıng negizinde basqarýshylyq sheshimder qabyldanyp, memlekettik organdar jumysynyń tıimdiligi baǵalanady.
