Májiliste óńdeýshi ónerkásipti damytýǵa baǵyttalǵan jańa zań jobasy tanystyryldy
NUR-SULTAN. QazAqparat – Búgin Májiliste ótken dóńgelek ústel barysynda «Ónerkásiptik saıasat týraly» zań jobasy talqylandy, dep habarlaıdy QazAqparat tilshisi.
«Ónerkásiptik saıasat týraly» zań jobasynyń basty mindeti – óńdeýshi ónerkásipti damytýdyń negizgi qaǵıdasyn, maqsat-mindetterin aıqyndaý. Maqsaty – básekege qabiletti, joǵary tehnologııaly, eksportqa baǵdarlanǵan ónim óndirisin ulǵaıtý, sondaı-aq damýdyń shıkizattyq modelinen alshaqtap, óńdeýshi ónerkásipti turaqty damytý. Úkimettik redaktsııada zań jobasy bes bólimnen quralǵan», - dedi zań jobasyn depýtattarǵa tanystyrǵan QR Indýstrııa jáne ınfraqurylymdyq damý vıtse-mınıstri Amanııaz Erjanov
Onyń atap ótýinshe, alǵashqy bólim «Jalpy erejelerdi» qamtıdy. Onda: uǵymdyq apparat; ónerkásiptik saıasattyń maqsaty, mindeti men qaǵıdalary; eldiń ındýstrııalyq damýyn baǵalaý qarastyrylady. 2-bólim - «Ónerkásipti damytýdyń bazalyq sharttary». Onda ónerkásip saıasaty máseleleri jónindegi vedomstvoaralyq komıssııa; ónerkásipti damytý qory, sondaı-aq, ónerkásipti memlekettik yntalandyrýdyń normalary rettelgen.
«Ótkizý naryqtarynda ilgeriletý» dep atalatyn Z-bólim otandyq ónerkásiptik kásiporyndardy shetelde, ári, syrtqy jáne ishki naryqtarda qoldaý, ilgeriletýge baǵyttalǵan. Qosylǵan qunnyń jahandyq tizbekke enýine járdemdesýdi kózdeıdi. Osylaısha, ulttyq ekonomıkanyń óz-ózin derbes qamtamasyz etýine arnalǵan. 4-bólim -ónerkásiptik qurastyrý týraly kelisimderdi retteý, ónerkásiptegi ǵylymı jáne ǵylymı-tehnıkalyq qyzmet nátıjelerin kommertsııalandyrý úshin jaǵdaı jasaý, sondaı-aq eńbek ónimdiligin arttyrý arqyly «Ónerkásiptiń tıimdiligi men básekege qabilettiligin arttyrý». 5-bólim - «Qorytyndy erejeler», - dedi vıtse-mınıstr.
