Májiliste munaı-gaz-hımııa salasyn damytý máseleleri talqylanyp jatyr

NUR-SULTAN. QazAqparat – Májiliste «Qazaqstan Respýblıkasynyń munaı jáne gaz hımııasyn damytý perspektıvalary týraly» keńeıtilgen taqyryptyq otyrysy ótip jatyr, dep habarlaıdy QazAqparat tilshisi.

Otyrysqa Parlament Májilisiniń depýtattary, Energetıka, Ekologııa, geologııa jáne tabıǵı resýrstar, Indýstrııa jáne ınfraqurylymdyq damý mınıstrlikteriniń, Strategııalyq josparlaý jáne reformalar jónindegi agenttiktiń basshylary, múddeli memlekettik organdardyń, jergilikti atqarýshy organdardyń, «Samuryq-Qazyna» AQ, «KAZENERGY» Qazaqstan munaı-gaz jáne energetıka kesheni uıymdary qaýymdastyǵynyń, «Atameken» UKP, «Adal», «Aýyl» partııalarynyń, Jalpyulttyq sotsıal-demokratııalyq partııanyń ókilderi jáne basqalar qatysýda.

Májilistiń Ekologııa máseleleri jáne tabıǵat paıdalaný komıtetiniń tóraǵasy Aleksandr Mılıýtın Memleket basshysy Qasym-Jomart Toqaev óziniń 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna Joldaýynda tez arada qara jáne tústi metallýrgııa, munaı hımııasy, kólik qurastyrý jáne mashına jasaý, qurylys materıaldary men azyq-túlik óndirý jáne basqa da salalarda qaıta óńdeý isiniń jańa salalaryn damytý qajettigin aıtqanyn eske saldy.

Energetıka mınıstri Nurlan Noǵaev óz baıandamasynda munaı-gaz hımııasy sektoryn damytý týraly vedomstvonyń paıymyn ortaǵa saldy.

Mınıstrdiń aıtýynsha, aldaǵy josparlar óńirlik tutyný naryǵyn damytýǵa serpin beretin iri munaı-gaz hımııasy óndiristerin qurýǵa baǵyttalmaq. Sondaı-aq, Nurlan Noǵaev atalmysh óndiris oshaqtaryn biryńǵaı aýmaqta ornalastyrýǵa basa nazar aýdarylyp, munaı-gaz hımııasy úshin qajetti shıkizat shyǵaratyn óńdeý qýattaryn qurýǵa iri munaı-gaz ken oryndarynyń shıkizattyq áleýetin paıdalaný kózdelip otyrǵanyn atady.