Májiliste múgedektikti belgileý men ony qaıta rásimdeýge qatysty qıyndyqtar aıtyldy
«Tolǵandyryp otyrǵan máselelerdiń biri múgedektikti belgileý, ony qaıta rásimdeý jáne balalar úshin múgedektikti qaıta qaraý merzimin uzartýǵa qatysty. Bul múgedekter úshin kúrdeli máselelerdiń biri, óıtkeni múgedektikti belgileý - belgili bir ýaqytty ǵana emes, sonymen qatar kóptegen qujattardy jınaýdy jáne tapsyrýdy talap etetini óte kúrdeli. Qaǵazbastylyqpen qatar, medıtsınalyq-áleýmettik saraptamany talap etedi. Búgingi tańda Eńbek jáne halyqty áleýmettik qorǵaý mınıstrliginiń málimetteri boıynsha respýblıkada 696 825 múgedek bar. Onyń ishinde 85 paıyzy eresekter jáne 14 paıyzy 18 jasqa deıingi balalar. Bul adamdardyń óz betinshe kóp qujat jınaýy óte qıyn. Bul ásirese aýyl turǵyndaryna qatysty», - dedi Ǵ. Tashqaraev Úkimet basshysy Álıhan Smaıylovtyń atyna joldaǵan saýalynda.
Onyń atýynsha, múgedektikti alý merzimi orta eseppen 2 aıdan bir jylǵa deıin sozylady.
«Qazaqstan Respýblıkasy Eńbek jáne halyqty áleýmettik qorǵaý mınıstrliginiń resmı derekteri boıynsha 2021 jyly sotqa 102 talap-aryz berilip, qaraldy. Onyń ishinde 77 (75,5%) is boıynsha talap-aryzdar qanaǵattandyrýdan bas tartyldy jáne 25 is boıynsha aryzdanýshylardyń talaptary qanaǵattandyryldy. Múgedektikti tanýdyń qoldanystaǵy tetigimen sybaılas jemqorlyq táýekelderi bar. Múgedekterdiń pikirinshe, qaıta saraptamadan ótý máseleleri múldem aqylǵa syımaıdy jáne kóp jaǵdaıda osy máselelermen aınalysýǵa ýákiletti organdar men mamandardyń áreketine narazylyq týǵyzady», - dedi depýtat.
Baıandalǵannyń negizinde, kelesi suraqtar boıynsha aqparat berý týraly suraý jasaldy:
1.Memleket basshysy Qasym-Jomart Kemeluly Toqaevtyń múgedektikti belgileý rásimin ońaılatý jónindegi tapsyrmasynyń ýaqytyly oryndalmaýynyń sebepteri qandaı? Osy tapsyrmany iske asyrý boıynsha qandaı sharalar qabyldandy?
2. Aýyldyq jerlerdegi turǵyndar úshin medıtsınalyq rastaýdy ótý rásimin ońaılatý boıynsha qandaı jumystar júrgizildi? Tasymaldaýǵa kelmeıtin adamdardy, sondaı-aq shalǵaıdaǵy eldi mekenderde turatyn múgedek adamdardy syrttaı rastaý (qaıta rastaý) boıynsha qandaı sharalar qabyldandy?
