Májiliste «Múddelilik qoldaý týraly» zań jobasynyń tanystyrlymy ótti
ASTANA. Aqpannyń 23-i. QazAqparat /Qanat Mámetqazyuly/ - Búgin QR Parlamenti Májilisinde «Múddelilik qoldaý týraly» zań jobasynyń tanystyrlymy bolyp ótti,
dep habarlaıdy QazAqparat.
Atalǵan zań jobasy Memleket basshysynyń 2008 jylǵy qarashanyń 6-synda Sybaılas jemqorlyqqa qarsy forýmda júktegen tapsyrmasyn oryndaý maqsatynda ázirlengen. Qazirgi ýaqytta qoǵamnyń memleketke áser etýiniń keńeıýi demokratııalandyrý úderisiniń qajetti elementi bolyp tabylady. Osy turǵydan alǵanda azamattardyń saılaý úderisine qatysýymen qatar áser etý nysandarynyń biri zań jobalaryn múddelilik qoldaý (lobbızm) bolyp tabylady.
Toqtala ketetin jaıt, shet memleketterdiń tájirıbesinde múddelilik qoldaý ınstıtýty burynnan áreket etip, bul memlekettik bılikke qoǵamdyq yqpal etýdiń jalpyǵa tanylǵan jáne qajetti bóligi dep esepteledi. Mamandardyń paıymdaýynsha, zańdardy múddelilik qoldaý ınstıtýty halyqtyń keń tobynyń bastamasy men múddelerin eskerýge múmkindik beredi. Azamattardy, túrli áleýmettik toptardy, qoǵamdyq birlestikterdi qoǵamǵa qajetti zańdardy ázirleý úderisine tarta túsedi. Osyǵan oraı, múddelilik qoldaý týraly zańnamany qalyptastyrý QR Konstıtýtsııasynyń azamattardyń memleket isin basqarýǵa qatysý quqyǵy týraly erejesin damyta túsedi.
Jalpy qujatty qabyldaý qoǵam men bıliktiń ózara is-qımyl úderisine demokratııalyq jáne quqyqtyq sıpat berýge septigin tıgizedi dep boljanýda.
