Májiliste memlekettik-jeke menshik áriptestik týraly zań jobasy tanystyryldy
ASTANA. QazAqparat - Búgin Májiliste «Memlekettik-jeke menshik áriptestik týraly» zań jobasynyń tanystyrylymy ótti. Qujat Elbasynyń memleket pen bıznestiń uzaq merzimdi ózara is-qımylynyń barlyq aspektilerin keshendi retteý qajettiligi týraly tapsyrmasyn iske asyrý maqsatynda ázirlengen.
Sonymen qatar, zań jobasy elimizdiń áleýmettik-ekonomıkalyq damý mindetterin sheshýge baǵyttalǵan memlekettik-jeke menshik áriptestiktiń quqyqtyq alańyn qurý qajettiginen týyndap otyr.
«Zań jobasynyń maqsaty memleket pen jeke menshik sektor arasyndaǵy uzaqmerzimdi yntymaqtastyq qalyptastyrý bolyp tabylady. Osyǵan baılanysty qujat arqyly memlekettik aktıvterdi basqarýǵa jeke menshik sektordan qarajat tartý, bıýdjetke túsetin aýyrtpalyqtardy azaıtý, ınvestıtsııalar tartý, kvazımemlekettik sektordy memlekettik-jeke menshik áriptestik jobalaryna qamtý kózdeledi», -dedi Ulttyq ekonomıka birinshi vıtse-mınıstri Marat Qusaıynov.
Onyń aıtýynsha, qazirgi qoldanystaǵy zańnamada memlekettik-jeke menshik áriptestiktiń eki tásili bekitilgen. Onyń biri - kelisimsharttyq, sonyń ishinde kontsessııalyq bolsa, ekinshisi - ınstıtýtsıonaldyq áriptestik. «Qazirgi tańda Qazaqstanda memlekettik-jeke menshik áriptestik boıynsha kontsessııalyq formaǵa basymdyq beriledi. Bul rette áriptestik negizinen qurylys salasyndaǵy kúrdeli jáne kapıtalqamtymdy jobalardy ǵana qamtyp otyr»,- dedi M. Qusaıynov. Onyń sózine qaraǵanda, qoldanystaǵy zańnamada memlekettik-jeke menshik áriptestiktiń naqty formalary rettelmegen. Bunymen qosa, qoldanystaǵy zańnamanyń basqa da olqylyqtary barshylyq. Al zań jobasy osyndaı olqylyqtardy joıýǵa baǵyttalady.
«Máselen, bizdegi memlekettik-jeke menshik áriptestiktiń qurylymy qurylys salasyna ne bolmasa qaıta jańǵyrtý jumystaryna baılanysty qarastyrylǵan. Ekinshiden, jeke sektor tarapynan memlekettik-jeke menshik áriptestik jobalaryna bastama jasaý tetikteri esh qamtylmaǵan. Úshinshiden, memlekettik-jeke menshik áriptestik jobalaryn ótkizý tym kúrdelenip ketken», - deıdi M. Qusaıynov.
Tutastaı alǵanda zań jobasy jaǵymsyz áleýmettik-ekonomıkalyq saldarǵa soqtyrmaıdy, kerisinshe jurtshylyq úshin memlekettik-jeke menshik áriptestiktiń meılinshe tıimdi tetigin qalyptastyrýǵa múmkindik ashady.
