Májiliste memlekettik turǵyn úı qorynan turǵyn úı berýdi uıymdastyrý máseleleri qaraldy
ASTANA. 6 maýsym. QazAqparat - Búgin Májiliste memlekettik turǵyn úı qorynan turǵyn úı berýdi uıymdastyrý máselelerine qatysty zań jobasy boıynsha qurylǵan jumys tobynyń alǵashqy otyrysy ótti.
Aıta ketý kerek bul zań jobasyna Májilis depýtattary Maıra Aısına, Serikjan Qanaev, Romın Mádınov, Anatolıı Pepenın jáne Shavhat Ótemisovter bastamashylyq jasaǵan.
Jumys tobynyń jetekshisi Májilistiń Áleýmettik-mádenı damý komıtetiniń múshesi, depýtat Maıra Aısına búgingi tańda bul zań jobasyn qabyldaýdyń mańyzdylyǵy týraly aıtyp ótti. Zań jobasynda turǵyn úıge muqtaj ortalyq, jergilikti memlekettik organdardyń qyzmetkerlerine, mádenıet, óner jáne sport salalarynda jumys isteıtin azamattarǵa, sondaı-aq memlekettik turǵyn úı qorynan turǵyn úı alǵanǵa deıin astananyń jergilikti atqarýshy organynda esepte turǵan jetim balalarǵa memlekettik turǵyn úı qorynan turǵyn jaıdy paıdalanýǵa berý máselelerin zań jolymen retteý kózdelip otyr.
Osy zań jobasymen «Qazaqstan Respýblıkasy astanasynyń mártebesi týraly», «Memlekettik múlik týraly» jáne «Turǵyn úı qatynastary týraly» qoldanystaǵy zańdarǵa túzetýler engizý kózdelgen. Zań jobasy «Qazaqstan Respýblıkasynyń keıbir zańnamalyq aktilerine memlekettik turǵyn úı qorynan turǵyn úı berýdi uıymdastyrý máseleleri boıynsha tolyqtyrýlar engizý týraly» dep atalady.
Alǵashqy otyrysta Salystyrma kestege túsirilgen Májilis depýtattary usynǵan túzetýler qaraldy. Aldan Smaıyl, Jeksenbaı Dúısebaev, Galına Baımahanova jáne basqa depýtattar keıbir baptar boıynsha óz pikirlerin bildirdi.
Otyrysty qorytyndylaǵan jumys tobynyń jetekshisi Maıra Aısına «Birqatar túzetýler áli de pysyqtaı túsýdi qajet etedi. Sondyqtan kelesi otyrysqa deıin baptarǵa engiziletin tolyqtyrýlardyń zańdyq normalary jan-jaqty qaralatyn bolady»,- dedi.
