Májiliste memlekettik tapsyryspen bilim alý máselesi qaraldy
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine bilim berý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.
Zań jobasy bilim berý protsesin odan ári jetildirý, onyń ishinde bilim berý jetistikteriniń monıtorıngin júzege asyrý maqsatynda ázirlendi.
Májilis depýtaty Ábdimanap Bekturǵanovtyń aıtýynsha, QR Eńbek kodeksiniń 119-babyna sáıkes, bilim alýshylardyń dýaldy oqytý týraly shart negizinde óndiristik oqytýdan jáne kásiptik praktıkadan ótken ýaqyty eńbek ótiline esepteledi. Bul rette eńbek qyzmetin rastaıtyn qujattardyń tizbesinde sharttyń osy túri qamtylmaǵan bolatyn. Osyǵan baılanysty quqyqtyq kollızııany bolǵyzbaý maqsatynda jumyskerdiń eńbek qyzmetin rastaıtyn qujattardyń tizbesin jańa qujatpen – dýaldy oqytý týraly shartpen tolyqtyrý usynylady.
«Bilim berý salasyndaǵy ókiletti organǵa tehnıkalyq jáne kásiptik orta bilimnen keıingi bilimi bar kadrlardy daıarlaýǵa memlekettik tapsyrysty qalyptastyrý ári bólý qaǵıdalaryn bekitý boıynsha quzyret berý arqyly sheshý usynylady. Máselen, tehnıkalyq jáne kásiptik bilim berý júıesinde kadrlardy daıarlaýǵa memlekettik tapsyrys jumyspen qamtý organdarynyń, óńirlik kásipkerler palatalarynyń usynystary negizinde óńirlik eńbek naryǵynyń qajettilikteri eskerile otyryp ornalastyrylady. Bul rette memlekettik bilim berý tapsyrysyn qalyptastyrý rásimi kózdelmegen. Usynylyp otyrǵan túzetý memlekettik tapsyrysty ornalastyrý jáne ony berý kezinde sybaılas jemqorlyq faktorynyń yqpalyn tómendetýge múmkindik beredi», - dedi depýtat.
Aıta keteıik, joǵary oqý ornyn bitirýshiniń memlekettik bilim berý tapsyrysynda oqý uzaqtyǵyna proportsıonaldy túrde eńbekpen óteý merzimin belgileý arqyly sheshý usynylady. Osylaısha, memlekettik bilim berý tapsyrysynda bilim alǵan azamattar búkil kezeńde – barlyq úsh jyldy da jumyspen óteıtin bolady. Al bilim alýshylar ishinara, ıaǵnı bir bóligin aqyly negizde – memlekettik bıýdjet esebinen oqý kezeńine mólsherles óteıtin bolady.
«Bilim berýdiń jańartylǵan mazmunyn eskere otyryp, bazalyq bilimdi tekserýge baǵyttalǵan bilim berýdi syrttaı baǵalaýdyń «bilim berý jetistikteriniń monıtorıngi» atty jańa modelin engizý arqyly sheshý usynylady. Halyqaralyq tájirıbeni eskere otyryp, bilim berý uıymdaryn syrtqy baǵalaý tetigi jetildiriletin bolady, bul bilim alýshylardyń bilim sapasyn arttyrýǵa múmkindik beredi. Osylaısha, zań jobasyn qabyldaý bilim berý protsesin jetildirý, onyń ishinde kásibı kadrlardy daıarlaý jáne olardy odan ári jumysqa ornalastyrý úshin barlyq qajetti jaǵdaılardy jasaıdy dep sanaımyz», - dedi Ábdimanap Bekturǵanov.
