Májiliste Memlekettik shekara týraly jańa zań jobasy talqylandy
ASTANA. 5 jeltoqsan. QazAqparat - Búgin Májiliste «Qazaqstan Respýblıkasynyń Memlekettik shekarasy týraly» zań jobasy boıynsha Memlekettik shekarany qorǵaý jáne kúzetý zańnamalaryn jetildirýge arnalǵan dóńgelek ústel bolyp ótti. Oǵan Májilis depýtattary, memlekettik organdar men múddeli mınıstrlikter, sondaı-aq qoǵamdyq uıymdardyń ókilderi qatysty.
Ulttyq qaýipsizdik komıteti Shekara qyzmeti dırektorynyń mindetin ýaqytsha atqarýshy Turǵanbek Stambekovtiń aıtýynsha, Memlekettik shekarany qorǵaý men kúzetý máselelerin jetildirý Shekara qyzmetin odan ári damytý quqyqtyq retteýdi talap etedi. «Jańa zań jobasynda biz shekarany qorǵaý men kúzetýdi, oǵan qolsuǵylmaýshylyqty qamtamasyz etetin basty organ - Shekara qyzmetiniń quzyretin naqtyladyq. Shekarany qorǵaýdaǵy ózara uıymdastyrý máseleleri keńeıtilip, bunyń ózi shekaralyq keńistikti qorǵaýǵa qatysty kóptegen ókiletti organdar arasyndaǵy ákimshilik kedergilerdi joıýǵa alyp keldi. Sonymen qatar, zań jobasynda QR Úkimetiniń janynda memlekettik shekara qyzmetiniń komıssııasy qurylatyny kózdeledi», - deıdi T. Stambekov.
Onyń sózine qaraǵanda, zań jobasynda aǵymdaǵy jyly «Arqankergen» shekara zastavasy men «Terisaıryqta» oryn alǵan oqıǵalardy boldyrmaýdyń, aldyn alýdyń sharalary qamtylǵan. Bul rette shekara qyzmetine áskerge qabyldanýshylarǵa erekshe talaptar qoıylatyn bolady.
