Májiliste MÁMS boıynsha Úkimet saǵaty ótedi

ASTANA. QazAqparat – Kúzde Májiliste MÁMS júıesindegi máseleler týraly parlamenttik tyńdaý ótedi. Bul týraly Májilistegi Áleýmettik-mádenı damý komıtetiniń tóraǵasy Ashat Aımaǵambetov málim etti, dep habarlaıdy QazAqparat tilshisi.

«Týystarymyz da, ózim de medıtsına salasymen kúndelikti ushyrasyp otyramyz. Mundaǵy eń úlken problemanyń biri – osy medıtsınalyq qyzmettiń sapasy men qoljetimdiligi. Mysaly, mindetti áleýmettik medıtsınalyq saqtandyrý aıasynda magnıttik-rezonansty tekserýden óteıin deseń, kompıýterlik tomografııa nemese ýltradybystyq zertteýden ótkińiz kelse, 3-4 aı kútý kerek bolady. Al, sol qyzmetterdi MÁMS aıasynan tys, aqyly negizde ótem deseńiz, «Mine, 5 mınýttan keıin óte qoı» deıdi. Bizge saılaýshylar osy suraqty kóp qoıyp jatyr. Biz nege MÁMS-ke jarna tóleımiz, nege onyń ıgiligin kórip otyrǵan joqpyz?» dep suraıdy. Negizi MÁMS qajetti dúnıe», - dedi Ashat Aımaǵambetov «Amanat» atynan saılanǵan máslıhat depýtattarynyń respýblıkalyq forýmynyń kýlýarynda.

Depýtattyń aıtýynsha, damyǵan, órkenıetti elderdiń bárinde osyǵan uqsas júıe bar.

«Búginde densaýlyq saqtaý salasynda kóp jumys atqarylyp jatyr. Biraq, MÁMS júıesiniń tıimdiligin arttyrýymyz kerek. Azamattar MÁMS-ke aı saıyn jarna tólep otyrǵandyqtan, medıtsınalyq qyzmettiń sapasy men qoljetimdiligi artqanyn sezip, kórýi kerek. Ony sezinbese, bul júıege qosymsha reforma kerek degen sóz. Osy turǵydan qarap, usynystarymdy aıtyp júrmin. Bul jerde jaı ǵana syn aıtý emes, usynys aıtý mańyzdy. Biz qazir Densaýlyq saqtaý mınıstrligimen, mınıstrmen tıisti jumysty birge atqaryp jatyrmyz. Birneshe ret mınıstr Májilistegi komıtetimizge keldi. Osyǵan deıin MÁMS boıynsha aıtylǵan usynystardyń qaısysy, qaı deńgeıde oryndalǵany týraly málimet berdi. Jazda taǵy qosymsha jumys isteımiz dep otyr. Qyrkúıek aıynda Májiliste Úkimet saǵatyn ótkizip, MÁMS boıynsha parlamenttik tyńdaý ótkizemiz. Sonda osy máseleni talqylaımyz», - dedi Ashat Aımaǵambetov.