Májiliste qylmystyq zańnamany izgilendirý máselelerine qatysty zań jobasynyń tanystyrylymy ótedi
ANA. 3 qarasha. QazAqparat - Erteń, 4 qarasha, beısenbi kúni, Májiliste «Qazaqstan Respýblıkasynyń keıbir zańnamalyq aktilerine qylmystyq zańnamany odan ári izgilendirý jáne qylmystyq protsestegi zańdylyqtyń kepildikterin kúsheıtý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy ótedi.
Zań jobasynyń tanystyrylymy QR Parlamenti Májilisi Tóraǵasynyń orynbasary Vladımır Bobrovtyń, QR Bas prokýrory Qaırat Mámıdiń jáne quqyq qorǵaý organdary ókilderiniń qatysýymen ótedi.
Otyrysqa Májilistiń Zańnama jáne sot-quqyqtyq reforma komıtetiniń tóraǵasy Rahmet Muqashev jetekshilik etedi.
Zań jobasynyń maqsaty jóninde QR Bas prokýrorynyń birinshi orynbasary Iogann Merkel baıandama jasaıdy dep kútilýde.
Zań jobasy boıynsha qurylǵan jumys tobyna Májilistiń Zańnama jáne sot-quqyqtyq reforma komıtetiniń múshesi Erzat Álzaqov jetekshilik jasaıdy.
Engiziletin túzetýlerdiń negizgi maqsaty qylmystyq zańnamany izgilendirý jáne ony quqyqtyq memleket standarttaryna sáıkes keltirý, qylmystyq sot isin júrgizýdiń qudalaý sıpatyn azaıtý, qylmystyq protseste zańdylyqtyń qosymsha kepildikterin belgileý, onyń ishinde jeke kásipkerlik múddesin qorǵaý dárejesin arttyrý.
Zań jobasy qylmystyq, qylmystyq is júrgizý jáne qylmystyq-atqarý zańnamasyna, sondaı-aq ákimshilik quqyq buzýshylyqtar týraly zańnamaǵa ózgerister men tolyqtyrýlar engizýdi kózdeıdi.
Zań jobasyn qabyldaý qosymsha qarjy shyǵyndaryn talap etpeıdi jáne teris áleýmettik-ekonomıkalyq saldardy týdyrmaıdy.
