Májiliste kóshi-qon zańnamasyn jetildirý joldaryna arnalǵan dóńgelek ústel jıyny ótti
ASTANA. Sáýirdiń 15-i. QazAqparat /Qanat Mámetqazyuly/ - Búgin QR Parlamenti Májilisinde «Qazaqstannyń kóshi-qon zańnamasy: jetildirý joldary» atty taqyrypta dóńgelek ústel jıyny bolyp ótti.
Basqosýdy Parlament Májilisi janyndaǵy Kóshi-qon máseleleri jáne otandastarmen baılanys jónindegi konsýltatsııalyq keńes pen «Jańa Qazaqstan» depýtattyq toby birlesip uıymdastyrdy, dep habarlaıdy QazAqparat.
«1997 jyly «Halyqtyń kóshi-qony týraly» zań qabyldanǵan bolatyn. Sońǵy 13 jylda bul zańǵa 3 ret ózgertýler men tolyqtyrýlar engizildi. Biraq álemdegi jahandaný úderisteri elimizdiń kóshi-qon salasyna da áserin tıgizýde. Sondyqtan da «Kóshi-qon týraly» jańa zań jobasyn ázirleý qajettigi týdy. Onyń ústine 2007-2015 jyldarǵa arnalǵan kóshi-qon saıasatynyń jańa tujyrymdamasy qabyldanǵany belgili. Bul rette Memleket basshysy da qalyptasyp otyrǵan jaǵdaıǵa oraı elimizge jańa zań qajet ekendigin alǵa tartqan bolatyn», dedi jıynda ashyp sóz sóılegen Májilis depýtaty, Kóshi-qon máseleleri jáne otandastarmen baılanys jónindegi Konsýltatsııalyq keńes tóraǵasy Ýálıhan Qalıjan.
Onyń aıtýynsha, búgingi kúni elimizge oralǵan oralmandardyń jalpy sany 1 mln.-ǵa jýyq adamdy qurap otyr. Olardyń 55 paıyzy eńbekke qabiletti jastaǵylar bolsa, 41,2 paıyzy 18 jasqa tolmaǵan óskinder. Sonda oralmandardyń 5 paıyzy ǵana zeınetkerlik jasta bolyp tabylady. Budan bólek depýtat Ý. Qalıjan sońǵy jyldary elimizdiń ishki kóshi-qon da kúrdelenip otyrǵanyn atap ótti. Máselen, oblysaralyq jáne oblystyń óz ishinde kóship-qonýshylar sany 1991-2008 jyldar aralyǵynda 5 mln. adamdy quraǵan. Qazir ishki kóshi-qon turaqty 300 myń adamnyń kóleminde ornyqqan.
«Jalpy, elimizdiń kóshi-qony máselesimen onshaqty memlekettik organdar aınalysady. Bul jańa zań jobasynda Úkimettiń, Syrtqy ister mınıstrliginiń, Іshki ister mınıstrliginiń, Ulttyq qaýipsizdik komıtetiniń, Eńbek jáne halyqty áleýmettik qorǵaý mınıstrliginiń quziretteri, ózara baılanystary aıqyndalyp naqtylanady», dedi Ý. Qalıjan.
Jıyn barysynda jańa zań jobasynyń tanystyrylymy da ótip, ol boıynsha basqosýǵa qatysyp otyrǵan qoǵamdyq uıymdar, birlestikter ókilderi pikirleri men usynystaryn ortaǵa saldy.
