Májiliste kóktemgi dala jumystaryna baılanysty sharýalardyń máselesi kóterildi
«Bul kúnderi ońtústik óńirlerde kóktemgi dala jumystary bastaldy. Biz Májilis depýtattary kúni keshe óńirlerge barǵanda, sharýalar kóktemgi dala jumystary kezinde memlekettik qoldaý sharalarynyń joqtyǵyn aıtyp shaǵymdandy. Óńirlerdi aralaý kezinde Memleket basshysynyń atap ótken máselelerdiń sheshilý barysy oıdaǵydaı bolmaı otyrǵanyna kóz jetkizdik. Bul birinshi kezekte Aýyl sharýashylyǵy mınıstrliginiń dármensizdigi men áreketsizdigine tikeleı qatysty bolyp otyr. Aýyldaǵy qalyptasyp otyrǵan osy jaǵdaıdan aýyl sharýashylyǵy mınıstrligi múlde beıhabar sııaqty áser qaldyrady», - dedi Q. Abasov Úkimet basshysy Álıhan Smaıylovtyń atyna joldaǵan saýalynda.
Onyń aıtýynsha, óńirlerde sharýalardyń kótergen máseleleri mynadaı bolyp otyr:
jeńildetilgen janar-jaǵarmaıdyń jetispeýshiligi jáne baǵasynyń qymbattylyǵy;
mıneraldy tyńaıtqyshtardyń jáne qosalqy jabdyqtardyń byltyrǵy jylmen salystyrǵanda eki-úsh esege qymbattaýy;
egis tuqymynyń joqtyǵy;
«Keń dala» baǵdarlamasy boıynsha kóktemgi dala jumystaryn qarjylandyrý áli kúnge deıin bastalǵan joq;
mınıstrliktiń sýbsıdııa baǵdarlamalary boıynsha turaqty ustanymy joq;
aǵyn sýdyń tapshylyǵy.
«Bul jaǵdaı aýyl eńbekkerlerin qatty alańdatýda. Osy oraıda ótken jyly qýańshylyqtyń zardabynan áli aıyqpaǵan dıqandarǵa «jyǵylǵanǵa judyryq bolyp otyr». Bul zárý máseleler aýyl sharýashylyq ónimderin óndirýge jáne sáıkesinshe sharýalardyń tabysyna, aýyl turǵyndarynyń jaǵdaıyna keri áser etetinin eskerýimiz kerek», - dedi depýtat.
Osy oraıda ol joǵaryda aıtylǵan máselelerdi sheshý úshin kelesi is-sharalardy shuǵyl qolǵa alý qajet dep sanaıdy:
- Birinshiden, mıneraldy tyńaıtqyshtardy sýbsıdııalaýdy sheshý.
- Ekinshiden, «Keń dala» baǵdarlamasy aıasynda mıneraldyq tyńaıtqyshtardyń, qosalqy jabdyqtardyń, egis tuqymdarynyń baǵasynyń qymbattaýyna baılynsty qarjy kólemin ulǵaıtyp, qamtamasyz etý.
- Úshinshden, arzandatylǵan baǵamen beriletin janar-jaǵarmaımen tolyqqandy qamtamasyz etý.
- Tórtinshiden, sýbsıdııalaý tásilderin turaqtandyrý qajet.
«Besinshiden, memleket tarapynan aýyl sharýashylyǵyna berilgen qoldaýdyń der kezinde oryndalýynda Aýyl sharýashylyǵy mınıstrliginiń jaýapkershiligin qatań suraý qajet dep esepteımiz», - dedi ol.