Májiliste kepildik berilgen zań kómegin usyný júıesin jetildirýge baǵyttalǵan zań jobasy tanystyryldy
ASTANA. 8 qazan. QazAqparat - Búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine memlekettiń kepildik berilgen zań kómegin usyný júıesin jetildirý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
Atalǵan zań jobasy, eń aldymen, tegin zańgerlik kómek kórsetýdi retteıtin quqyq normalaryn bir ǵana zańnamalyq aktide júıelendirýdi qarastyrady. Al qujatty qabyldaý Konstıtýtsııanyń 13-babynda qarastyrylǵan tegin kepildendirilgen bilikti zań kómegin alý quqyǵyn qamtamasyz etetin bolady. Bul rette barlyq memlekettik organdar óziniń quzyreti sheńberinde kez kelgen tulǵaǵa zańdyq aqparat túrindegi tegin kómekti usynýǵa mindetti bolady. Sonymen qatar, zań jobasynda tegin zań kómegin usynatyn barlyq bıýdjettik baǵdarlamanyń ákimshisi bolyp tabylatyn biryńǵaı ýákiletti organ aıqyndalady. Óıtkeni, qazirgi ýaqytta ondaı tegin zańgerlik qyzmetterdi júzege asyratyn advokattardyń jumysyna aqy tóleý birneshe memlekettik organdarmen (Іshki ister, Ádilet mınıstrlikteri, Bas prokýratýra, Ulttyq qaýipsizdik komıteti) júzege asyrylady.
«2010-2020 jyldar aralyǵyndaǵy Qazaqstannyń quqyqtyq saıasaty tujyrymdamasynda el azamattarynyń zań kómegin usynýdy sapalyq turǵydan jetildirý máselesi qarastyrylǵan. Ony usyný júıesi de jaqsartýdy talap etedi. Ásirese, tabysy tómen azamattarǵa ondaı kómek qoljetimdi bolýy shart. Bizdiń oıymyzsha, advokattyq qyzmetterdiń qalalyq jáne aýyldyq jerlerde teńdeı qamtylmaýyna qatysty problemany sheshetin ýaqyt kelip jetti. Bunda shyn máninde qyzmetter usynýdaǵy alshaqtyq basym. Advokattardyń aýyldyq aýmaqta jumys isteýi de sonshalyqty belsendi emes, al eldi mekender tipti advokattyq kómekpen qamtylmaǵan. Sondyqtan da tegin qyzmetti kórsetetin advokattardyń jumysyn ákimshilendirýdegi olqylyqtardy joıý da ózekti. Bul júıeni úılesimdi ári ashyq etý qajet. Sonda ǵana osy salaǵa bólingen bıýdjet qarajattary tıimdi paıdalanylady», - deıdi zań jobasyna qatysty sóılegen depýtat Raqmet Muqashev.
Onyń aıtýynsha, tegin zań kómegin retteıtin zań jobasy birqatar quqyqtyq normalardy bir ǵana zańnamamen júıelendirýdi kózdeıdi.
