Májiliste kepildendirilgen transfert týraly zań jobasy maquldandy
ASTANA. QazAqparat - QR Parlamenti Májilisinde "Qazaqstan Respýblıkasynyń Ulttyq qorynan 2018-2020 jyldarǵa arnalǵan kepildendirilgen transfert týraly" QR Zańy jobasy maquldandy, dep habarlaıdy QazAqparat tilshisi.
QR Ulttyq ekonomıka mınıstri Tımýr Súleımenovtiń baıandaýynsha, 2020 jyldan bastap Ulttyq qordan kepildendirilgen transfert kólemi 880 mlrd. teńgege qysqarady.
"Ulttyq qor qarajatyn qalyptastyrýdyń jáne paıdalanýdyń jańa tujyrymdamasy boıynsha, Qazaqstan Respýblıkasynyń Ulttyq qorynan respýblıkalyq bıýdjetke beriletin kepildendirilgen transferttiń mólsheri kezeń-kezeńimen tómendeıdi jáne 2018 jyly - 2 600 mlrd teńgeni, 2019 jyly - 2 300 mlrd teńgeni, 2020 jyly jáne aldaǵy jyldary - 2 trln teńgeni quraıdy", - dep atap ótti mınıstr Tımýr Súleımenov Májilistiń jalpy otyrysynda.
Atalǵan zań jobasy bıýdjet kodeksine sáıkes ázirlengen. Depýtattar óz kezeginde Ulttyq qordan respýblıkalyq bıýdjetke beriletin kepildendirilgen transfert mólsheriniń tómendeýi elimizdiń bolashaq urpaǵy úshin munaı kiristerin saqtaý saıasatyna jáne memleket qazynasynyń álemdik shıkizat naryǵyndaǵy baǵa ózgerýinen týyndaıtyn táýeldiligin azaıtýǵa yqpal etetinin aıtty. Budan bólek, depýtattar Úkimetten ulttyq qor qarajatyn utymdy paıdalanýdy jáne ony tolyqtyrý dınamıkasyna turaqty negizde monıtorıng júrgizip otyrýdy surady.
Talqylaýdan soń "Qazaqstan Respýblıkasynyń Ulttyq qorynan 2018-2020 jyldarǵa arnalǵan kepildendirilgen transfert týraly" Zań jobasy maquldandy.
