Májiliste Qazaqstandaǵy áıelder men balalardyń ómirine ekonomıkalyq daǵdarystyń áseri jónindegi zertteý nátıjeleri tanystyryldy
ASTANA. Aqpannyń 16-sy. QazAqparat /Qanat Mámetqazyuly/ - Búgin QR Parlamenti Májilisinde «Qazaqstan Respýblıkasynda balalardyń saý-salamattyǵyna qarjy jáne ekonomıkalyq daǵdarystyń tıgizetin yqpaly» atty dóńgelek ústel jıyny bolyp ótti.
Jıyn barysynda QR Úkimeti janyndaǵy «Ulttyq taldaý ortalyǵy» AQ, ıÝNISEF jáne Halyqaralyq damý ınstıtýttarynyń birlesip júrgizgen «Qazaqstandaǵy áıelder men balalardyń ómirine ekonomıkalyq daǵdarystyń, azyq-túlik pen otynǵa baǵa turaqsyzdyǵynyń áseri» atty zertteýiniń qorytyndylary usynyldy, dep habarlaıdy QazAqparat.
Dóńgelek ústeldiń negizgi maqsaty - Qazaqstandaǵy balalardyń ómiri men ál-aýqatyna qarjylyq jáne ekonomıkalyq daǵdarystyń yqpal etý saldaryn eńserý boıynsha sharalardy qarastyrý jáne osy baǵytta usynystar ázirleý bolyp otyr.
«Árıne, jahandyq daǵdarys Qazaqstannyń damý qarqynyna áser etti. Degenmen, elimizde barlyq áleýmettik mindettemeleri, áleýmettik shyǵyndary, onyń ishinde balalarǵa qatysty járdemaqylar 2009-2010 jyldardaǵy bıýdjette esh qysqartýsyz qaldy. Sońǵy eki jylda elimizdiń ekonomıkalyq áleýeti qıyn-qystaý kezeńderde turaqtylyqty saqtap qalýdy qamtamasyz etti. Endigi kúni el ekonomıkasynyń saýyǵý belgileri baıqalyp otyr. Sol úshin de aldaǵy ýaqyttaǵy memlekettik saıasatty qalyptastyrýlar barysynda, bıýdjettik jobalaý kezeńderinde ana men bala máselesine basa nazar aýdarylatyn bolady», dedi Májilistiń Qarjy jáne bıýdjet komıtetiniń tóraıymy Gúljan Qaraǵusova.
Jıynda Qazaqstandaǵy balalardyń saý-salamattyǵyna daǵdarystyń tıgizetin yqpaly máseleleri boıynsha zertteýlerdiń negizgi qorytyndylary qysqasha tanystyrylyp ótti. Sonymen birge, elimizdiń búgingi ulttyq basymdyqtary men áleýmettik-ekonomıkalyq damý strategııalary konteksinde daǵdarys ýaqytynda jáne daǵdarystan keıingi kezeńderde balalar saýlyǵyn jaqsartý jóninde usynymdar talqylandy.
