Májiliste «Qazaqstan Respýblıkasyndaǵy ekologııalyq saıasattyń quraldary» taqyrybynda dóńgelek ústel ótedi
ASTANA. Naýryzdyń 9-y. QazAqparat - Naýryzdyń 11-i, beısenbi kúni Májiliste «Qazaqstan Respýblıkasyndaǵy ekologııalyq saıasattyń quraldary» taqyrybynda dóńgelek ústel ótedi, dep habarlaıdy QazAqparat.
Bul sharany QR Parlamenti Májilisiniń Ekologııa máseleleri jáne tabıǵat paıdalaný komıteti Eýropalyq Odaqtyń «Qazaqstan Respýblıkasynda ekologııalyq saıasattyń quraldaryn engizý» atty jobasymen birlesip uıymdastyryp otyr. Dóńgelek ústeldiń jumysyna Parlament depýtattary, Qorshaǵan ortany qorǵaý vıtse-mınıstri, basqa da múddeli mınıstrlikter men vedomstvolardyń, úkimettik emes uıymdardyń ókilderi, qorshaǵan ortany qorǵaý máseleleri jónindegi halyqaralyq jáne otandyq sarapshylar qatysady.
Ekologııa máseleleri jáne tabıǵat paıdalaný komıtetiniń hatshysy Valerıı Kotovıch málimdegendeı, otyrystyń maqsaty Eýropalyq Odaq tarapynan iske asyrylyp otyrǵan joba sheńberinde otandyq jáne halyqaralyq sarapshylar júrgizgen ekologııalyq saıasattyń qoldanystaǵy quraldar júıesin taldaý nátıjelerimen tanystyrý jáne talqylaý, sondaı-aq Qazaqstandaǵy ekologııalyq saıasattyń quraldaryn jetildirý boıynsha usynystardy ázirleý bolyp tabylady.
Dóńgelek ústeldiń otyrysynda qarastyrylatyn máselelerdiń ózektiligi kez-kelgen qyzmettiń, onyń ishinde ekologııalyq saıasattyń nátıjeliligi durys tańdalǵan quraldar men tásilderge baılanysty bolýymen mańyzdy.
Memlekettik bılik jáne azamattyq qoǵam ókilderiniń suhbaty aıasynda talqylanatyn máseleler ekologııalyq saıasattyń negizgi úsh salasy - qalalardaǵy atmosferalyq aýanyń lastanýy, sý resýrstaryn basqarý jáne qatty turmystyq qaldyqtardy basqarý máselelerin qamtıdy.
