Májiliste «Qazaqstan Respýblıkasy - Eýropalyq odaq» yntymaqtastyq komıtetiniń kezekti otyrysy ótti
Otyrys barysynda saıası jáne saýda-ekonomıkalyq yntymaqtastyq, aımaqtyq qaýipsizdik jáne ózara tıimdi is-qımyl taqyryptary sóz boldy. Atap aıtqanda, saýda-ekonomıkalyq jáne ınvestıtsııalyq yntymaqtastyqty nyǵaıtý, bilim berý, zańnyń ústemdigi, energetıka, qorshaǵan ortany qorǵaý, sý resýrstary, sonymen qatar, Qazaqstandaǵy adam quqyqtary máselelerine jete kóńil bólindi. Ásirese, Eýropalyq odaq pen Qazaqstan arasyndaǵy áriptestik pen yntymaqtastyq jónindegi keńeıtilgen kelisim jaıyna aıryqsha nazar aýdarylyp, Ortalyq Azııa boıynsha jańa EO strategııasy talqylandy.
Budan bólek, shara barysynda «Qazaqstan Respýblıkasy - Eýropalyq odaq» parlamenttik yntymaqtastyq komıtetiniń teń tóraǵalary S. Dıachenko men I. Grıgýle aqparat quraldary ókilderine suhbat berdi. S. Dıachenko óz sózinde: «Komıtet qurylǵan 15 jyl ishinde ekijaqty qarym-qatynastyń jetistikteri men kún tártibindegi mańyzdy máselelerdi ashyq ári ózara senim deńgeıinde talqylaıtyn tıimdi pikir almasý alańyna aınaldy. Eýropalyq odaqpen áriptestik qarym-qatynasty keńeıtý, odan ári tereńdetý Qazaqstannyń syrtqy saıasatyndaǵy basym baǵyttardyń biri» -dedi.
S. Dıachenko otyrys barysynda Qazaqstan Prezıdentiniń 5 ınstıtýtsınaldyq reformalary, ony júzege asyrýdyń «100 naqty qadam» baǵdarlamasy eýropalyq áriptesterdiń aıryqsha qyzyǵýshylyǵyn týǵyzǵanyna toqtaldy.
Al I. Grıgýle hanym, óz kezeginde komıtet otyrysynyń joǵary deńgeıde ótip jatqanyn, óte aýqymdy máselelerdi qamtyǵanyn alǵa tarta kelip: «Biz Qazaqstannyń úılesimdi qatynastardy damytý jáne aımaqtyq yntymaqtastyqty nyǵaıtý jolyndaǵy maqsattaryna dán rızamyz. Bul Qazaqstan halqy úshin de, eýropalyq elder úshin de óte mańyzdy. Ózara túsinistik ári senim deńgeıindegi is-sharalardyń barlyǵy bizdiń elderimizdiń ıgiligine qyzmet eteri sózsiz»,-dedi. Aqparat úshin aıta keteıik, yntymaqtastyq komıteti basqosý men pikir almasý úshin Qazaqstan Parlamenti men Eýropalyq Parlament músheleriniń forýmyn qurý maqsatymen Áriptestik jáne yntymaqtastyq kelisimi sheńberinde qurylǵan. Komıtet otyrystary Astana men Brıýsselde kezektesip ótkizilip turady.