Májiliste «Qazaqstan Respýblıkasy - Eýropalyq Odaq» Parlamenttik yntymaqtastyq komıtetiniń 9-shy otyrysy ótýde
ASTANA. Mamyrdyń 25-i. QazAqparat /Qanat Mámetqazyuly/ - Búgin Parlament Májilisinde «Qazaqstan Respýblıkasy - Eýropalyq Odaq» Parlamenttik yntymaqtastyq komıtetiniń 9-shy otyrysy óz jumysyn bastady.
Eýroparlament delegatsııasynyń qatysýymen ótip jatqan jıynǵa qazaqstandyq tarap tóraǵalyq etýde, dep habarlaıdy QazAqparat.
Jıyndy ashyp sóz sóılegen Parlament Májilisi Tóraǵasynyń orynbasary Vladımır Bobrov parlamenttik yntymaqtastyq tobynyń 2008 jylǵy sońǵy ótkizilgen otyrysynan keıingi ózgeristerge keńinen toqtalyp ótti. «Sodan beri Qazaqstan men EO-tyń ishki damýynda da, halyqaralyq arenada da, sondaı-aq Astana men Brıýssel arasyndaǵy baılanystarda da eleýli ózgerister oryn aldy. Ótken jyldar ishinde Qazaqstannyń aýqymdy jobasy «Eýropaǵa jol» memlekettik baǵdarlamasy jáne EO-tyń Ortalyq Azııadaǵy Strategııasy jarııalanyp, bul baǵyttaǵy sharalar júzege asa bastady. Sonymen birge, Eýropalyq Odaq jańa 21-shi onjyldyqty Lıssabon kelisiminiń kúshine enýimen birge qarsy alyp otyr. Buǵan sáıkes, EO-qa qatysýshy 27 memlekettiń ishki jáne syrtqy saıasatynda sapaly ózgerister kútiledi. Osyǵan oraı, biz aldaǵy ýaqytta eýropalyq parlamenttiń, onyń fýnktsııalarynyń aıtarlyqtaı keńeıetinin, al eýropalyq depýtattardyń halyqaralyq arenada saıası salmaǵy arta túsetinin túsinemiz», dedi V. Bobrov.
Eki kúnge jalǵasatyn jıyn barysynda taraptar energetıkalyq dıalogty arttyrý, qorshaǵan ortany qorǵaý, Qazaqstan men EO arasynda jańa kelisimder jasaý, Eýropalyq odaq reformasy, jańa qaýiptermen kúres sekildi mańyzdy máselelerdi talqyǵa salady. Sonymen qatar, otyrysta Ortalyq Azııadaǵy oryn alyp otyrǵan jaǵdaılarǵa, onyń ishinde EQYU, NATO, ShYU, AÓSІShK sekildi óńirlik jáne halyqaralyq uıymdardyń aımaqtaǵy róline sholýlar jasalady.
«Qazaqstan Respýblıkasy - Eýropalyq Odaq» Parlamenttik yntymaqtastyq komıtetiniń 9-shy otyrysynyń nátıjesinde qorytyndy qujat qabyldanady dep kútilýde. Sondaı-aq jıyn barysynda yntymaqtastyq komıtetiniń kelesi 10-shy otyrysyn ótkizýge qatysty máseleler de qaralady.
