Májiliste «Qazaqstan-beıbitshilik eli» taqyrybynda dóńgelek ústel ótti
ASTANA. Sáýirdiń 19-y. QazAqparat /Qanat Mámetqazyuly/ - Búgin QR Parlamenti Májilisinde «Qazaqstan-beıbitshilik eli» atty taqyrypta dóńgelek ústel bolyp ótti,
dep habarlaıdy QazAqparat.
Jıyndy ashyp sóz sóılegen Májilis Tóraǵasynyń orynbasary Jánibek Káribjanov basqosýdyń álemge beıbitshiliktiń basty bastamashysy bolyp otyrǵan Qazaqstannyń róline arnalatynyn atap ótti. «Táýelsizdik alǵannan bastap Qazaqstannyń beıbitshilik baǵytynda atqarǵan mańyzdy ári basty sharasy Semeı ıadrolyq polıgonyn jabý jáne qýaty boıynsha álemde tórtinshi orynda turǵan ıadrolyq arsenaldan erikti túrde bas tartýy bolyp otyr. Elbasy N. Nazarbaevtyń ójettiligi men saıası kóregendiliginiń arqasynda qabyldanǵan bul sheshim álemdik saıasat tájirıbesinde buryn bolyp kórmegen, halqymyz úshin tarıhı turǵydaǵy mańyzy asa zor batyl qadam. 40 jyldan astam ýaqyt ishinde-aq Semeı polıgonynda júrgizilgen 408 synaqtan 1,5 mln.-ǵa jýyq adam zardap shegip, ıadrolyq jarylystardyń radıatsııalyq ýytyn jutqan Qazaqstan úshin bul sheshimniń asa mańyzdy máni bar. Sonymen birge, Qazaqstannyń ıadrolyq qarýdy taratpaý jónindegi kelisimge qosylýy jáne beıbitshilik jolynda atqarǵan basqa da sharalary halyqaralyq antııadrolyq qozǵalystarǵa tyń serpin berip, ony jańa damý deńgeıine shyǵardy», dedi J. Káribjanov.
Dóńgelek ústel barysynda «Qazaqstan - beıbitshilik eli» atty derekti fılm kórsetildi. Onda Qazaqstannyń ıadrolyq qarýdan bas tartqan el retindegi Elbasynyń róli kórinis taýyp, ıadrolyq qaýipsizdik jolyndaǵy Qazaqstannyń ótkergen kúres joldary sýrettelgen.
Jıynda Májilis depýtaty Vıktor Rogalev «ıAdrolyq qarýsyz álemge jetý jolynda» degen taqyrypta, al depýtat Nurtaı Sabılıanov Semeı synaq aımaǵynyń qasiretteri taqyrybynda baıandama jasady.
