Májiliste Kaspıı teńizine qatysty qujat maquldandy
«Qazaqstan Kaspıı teńiziniń soltústik bóliginde ornalasqan. Mamandardyń paıymynsha, teńizdiń osy aımaǵy qorshaǵan orta turǵysynan keri áserlerge meılinshe sezimtal, osal bóligi bolyp esepteledi. Sondyqtan bul qujat elimiz úshin óte mańyzdy. Kaspıı teńizinde kómirsýtegi shıkizatynyń iri qorynyń bolýy osy sý basseıinindegi ekologııalyq ári bıologııalyq resýrstaryn saqtaý máselesin ózekti etedi. Qorshaǵan ortany qorǵaý salasyndaǵy yntymaqtastyqty nyǵaıtý maqsatynda Qazaqstan Negizdemelik konventsııaǵa qatysty birqatar hattamalarǵa qol qoıdy. Solardyń biri – Kaspıı mańy memleketteri 2018 jylǵy 20 shildedegi Máskeýde qol qoıǵan qorshaǵan ortaǵa áserdi baǵalaý jónindegi hattama», - dedi Ekologııa, geologııa jáne tabıǵı resýrstar mınıstri Maǵzum Myrzaǵalıev.
Osy oraıda ol bul transshekaralyq kontekstegi qujatty Ázerbaıjan, Iran, Qazaqstan, Reseı jáne Túrikmenstan qabyldaǵanyn eske saldy.
Sonymen qatar, osy hattamany retteýge jatatyn qyzmet túrleri anyqtaldy. Olar kelesideı: munaı óńdeý zaýyttary, jylý qýaty 300 megavatt nemese odan joǵary jylý elektr stantsııalary men basqa da jaǵý qondyrǵylary, atom elektr stantsııalary, avtomobıl joldaryn salý, rekonstrýktsııalaý jáne keńeıtý.
«Konventsııa erejelerin iske asyrý úshin jańa Ekologııa kodeksinde transshekaralyq ekologııalyq áserdi retteý, olardy júzege asyrý tártibi, quqyqtary men mindetteri qarastyrylǵan. Qazaqstan transshekaralyq áserlerdi baǵalaýǵa qozǵalatyn tarap retinde qatyssa, onda shyǵý tarapynan kelip túsken qujattar mınıstrliktiń biryńǵaı ekologııalyq portalynda (https://ecoportal.kz) ornalastyrylady. Óz kezeginde, múddeli memlekettik jáne jergilikti atqarýshy organdarǵa Qazaqstan Respýblıkasynyń memlekettik organdarynyń elektrondyq qujat aınalymynyń biryńǵaı júıesi arqyly jiberiledi. Al eger Qazaqstan transshekaralyq áserlerdiń shyǵý tarapy retinde qatyssa, onda qorshaǵan ortaǵa áserdi baǵalaý rásimi eldiń ishinde ǵana emes, sonymen qosa qozǵalatyn taraptar da qatar júrgiziledi. Mysaly, Kaspııde jańa obektiler salynǵan jaǵdaıda qorshaǵan ortaǵa áserdi baǵalaý qujattary tıisti jergilikti atqarýshy jáne múddeli memlekettik organdarǵa, sondaı-aq qozǵalatyn taraptarǵa qatar jiberiledi. Qozǵalatyn taraptardyń organdarymen konsýltatsııalardy eskere otyryp, qorshaǵan ortaǵa áserdi baǵalaýdy ótkizý merzimi shamamen 6 aıdy (180 kún) quraıdy. Bul Qorshaǵan ortaǵa áserdi baǵalaý hattamasynda jáne Ekologııa Kodeksiniń 81-babynyń 7-tarmaǵynda aıqyndalǵan», - dedi mınıstr.
Onyń sózine qaraǵanda, qoǵamdyq tyńdaýlarda kóterilgen máseleler boıynsha túpkilikti sheshimdi qorshaǵan ortany qorǵaý salasyndaǵy ýákiletti organ qabyldaıdy.
«Hattamany ratıfıkatsııalaý teris áleýmettik-ekonomıkalyq, quqyqtyq, ekologııalyq saldarǵa ákep soqtyrmaıdy. Respýblıkalyq bıýdjetten qosymsha qarjylyq shyǵyndardy qajet etpeıdi», - dedi vedomstvo basshysy.