Májiliste qarjylyq daǵdarystyń balalar jaǵdaıyna tıgizetin áseri jóninde dóńgelek ústel ótedi
ASTANA. Aqpannyń 15-i. QazAqparat /Qanat Mámetqazyuly/ - Erteń QR Parlamenti Májilisinde «Qarjylyq jáne ekonomıkalyq daǵdarystyń Qazaqstan Respýblıkasyndaǵy balalardyń saý-salamattyǵyna tıgizetin áseri» atty taqyrypta dóńgelek ústel ótedi,
dep habarlaıdy QazAqparat Parlament Májilisiniń baspasóz qyzmetine silteme jasap.
Parlament Májilisiniń Qarjy jáne bıýdjet komıteti men Qazaqstandaǵy ıÝNISEF Ókildiginiń birlesip uıymdastyrǵaly otyrǵan sharaǵa depýtattar, halyqaralyq jáne ortalyq memlekettik uıymdardyń jáne úkimettik emes uıymdar ókilderi qatysady dep kútilýde. Sonymen birge, jıyn barysynda halyqaralyq sarapshylardyń qarjylyq jáne ekonomıkalyq daǵdarystyń Qazaqstandaǵy balalardyń densaýlyǵy men jaǵdaıyna tıgizetin áseri jónindegi esebiniń tanystyrylymy bolady.
Sondaı-aq, erteń Májilistiń Halyqaralyq ister, qorǵanys jáne qaýipsizdik komıtetiniń keńeıtilgen otyrysy ótedi. Onda depýtattar «Keden odaǵynyń kedendik shekarasy arqyly ótkiziletin taýarlardyń kedendik qunyn aıqyndaýdyń durystyǵyn baqylaýdy júzege asyrý tártibi týraly kelisimdi ratıfıkatsııalaý týraly», «Taýarlardyń damýshy jáne az damyǵan elderden shyǵarylǵanyn aıqyndaý erejesi týraly kelisimdi ratıfıkatsııalaý týraly» sııaqty mańyzdy halyqaralyq zań jobalaryn qaraýdy josparlap otyr.
