Májiliste ınternet-kazınolarda tólemdi kredıttik kartalarmen toltyrýǵa tyıym salý usynyldy
«Qazaqstan Respýblıkasynyń «Oıyn bıznesi týraly» Zańyna sáıkes, elektrondy jáne ınternet-kazıno qyzmetine tyıym salynsa, «Jarnama týraly» Zańyna sáıkes bul oıyndar túrin jarnamalaýǵa da ruqsat joq. Sondaı-aq, oıyn bıznesiniń arnaıy aımaqtarǵa kóshirilýine qaramastan, halyq arasynda, onyń ishinde jastardyń ınternet-kazınolar usynatyn qumar oıyndar men bás tigýge qyzyǵýshylyǵy kúnnen-kúnge artýda. Dálel retinde, Qazaqstannyń zańnamasyna sáıkes, 2020 jyly qumar oıyndar men bás tigýdiń teris áserin azaıtý maqsatynda azamattar úshin osyndaı oıyndarǵa qatysýdan óz betinshe shekteý múmkindigi engizilgen. Degenmen, zań qabyldanǵan sátten bastap bir jarym jyl ishinde tizimge 430-dan astam adam tirkelse, olardyń 50 protsentin 30 jasqa tolmaǵan jastarymyz qurap otyr. Bul derttiń shyrmaýynda jas órenderimizdiń kóp ekendigin ańǵartady», - dedi depýtat Úkimet basshysynyń orynbasary Eraly Toǵjanovtyń atyna joldaǵan saýalynda.
Onyń aıtýynsha, búginde ınternette ońaı tabys ákelýdi kórsetetin ártúrli onlaın-kazınolar men býkmekerlik keńselerdiń agressıvti jarnamasynyń kólemi aıtarlyqtaı ósti.
«Onlaın-kazınolar taırańdap júrgende, otbasylardyń oırandalyp jatqandyǵy barshamyzǵa aıan. Zertteýlerdiń nátıjeleri boıynsha ınternet betterinde qaptaǵan qumar oıyndardyń tozaǵyna elimizdiń árbir onynshy otbasy ilinedi eken. Tıisti memlekettik organnyń málimetinshe, 2021 jyldyń basynan bastap ınternet-kazıno qyzmetine jáne jarnamasyna baılanysty zań buzýshylyqtar boıynsha 2 myńnan astam ınternet saıttarynyń jumysyna shekteý qoıylǵan. Alaıda, bul buǵattaý boıynsha sharalar onlaın-kazıno sanynyń azaıýyna alyp kelmeıdi, óıtkeni buǵattaýdan keıin jańa saıttar qurylady. Zańdyq tetikterdiń barlyq múmkindikterine qaramastan, tıisti memlekettik organdar tarapynan ınternet-kazınolardyń qyzmetine qarsy is-qımyl sharalaryn jetkiliksiz rettelýde dep esepteımiz», - dedi Elnur Beısenbaev.
Onyń aıtýynsha, halyqaralyq tájirıbe boıynsha Amerıkanyń kóptegen shtattarynda 2006 jyldan beri ınternet-kazıno qyzmetine tyıym salynǵan jáne qarjy uıymdary ınternet-kazınoǵa bás tigý jasaıtyn azamattardyń shottaryna qyzmet kórsete almaıdy. Al, Qytaı aýmaǵynda úkimet ınternet-kazınolar men býkmekerlik keńselerdiń saıttaryn ǵana emes, sondaı-aq atalǵan saıttardy jarnamalaıtyn resýrstardy da buǵattaý boıynsha júıeli sharalar qabyldaýda.
Osyǵan baılanysty ol jaýapty memlekettik organdardan ınternet-kazınonyń qyzmetine qarsy is-qımyl jasaý boıynsha sharalardy kúsheıtýdi surady:
- ınternet-kazınolarda jáne býkmekerlik keńselerde tólemderdi kredıttik kartalardyń kómegimen toltyrýǵa tyıym salýdy qarastyrýdy (bul kartalar kredıttik, ıaǵnı paıyzdyq mólsherlemesi joǵary);
- Qazaqstan Respýblıkasy zańnamasynyń talaptaryn buza otyryp, qumar oıyndardy uıymdastyrý, ótkizý jónindegi qyzmetti júzege asyryp kelgen sheteldik uıymdastyrýshylardyń arnaıy tizbesin ázirleý usynyldy.
