Májiliste Halyq densaýlyǵy kodeksiniń jobasy birinshi oqylymda maquldandy
Kodekstiń jobasy jeke jáne álemdik tájirıbeniń úzdik mysaldaryna negizdelgen densaýlyq saqtaýdyń jańa, uzaq merzimdi modelin qurýǵa, sondaı-aq medıtsınalyq qyzmetterdiń qoljetimdiligi men sapasyn qamtamasyz etý maqsatynda daıyndaldy. Kodeks jobasyn ázirleý barysynda Dúnıejúzilik densaýlyq saqtaý uıymynyń usynymdary, Ekonomıkalyq yntymaqtastyq jáne damý uıymyna múshe memleketterdiń damý kórsetkishteri jáne Qazaqstan Respýblıkasynyń 2050 jylǵa deıingi strategııasy eskerildi.
«Qoǵamdyq densaýlyq saqtaýǵa toqtalyp ótsek, elimizdiń densaýlyq saqtaý salasyndaǵy maqsattaryna jetý – memlekettiń, zańdy tulǵalar men azamattardyń ortaq jaýapkershiligi bolǵan jaǵdaıda ǵana múmkin.
Osyǵan oraı, Kodeks jobasyna buryn zańnamada kózdelmegen jańa baptar engizildi. Mysaly, salaaralyq árekettestik máselelerin sheshý maqsatynda qoǵamdyq densaýlyq salasyndaǵy memlekettik saıasatty iske asyrý bóliginde memlekettik organdardyń mindetteri aıqyndaldy.
Jumyskerler arasynda densaýlyq saqtaý men profılaktıka baǵdarlamasyn ázirlep, iske asyrý, salaýatty jumys oryndaryn qurý jáne jumyskerlerdiń skrınıngterden ótý mindettemesi – zańnamalyq túrde kózdelgen», - dedi Densaýlyq saqtaý mınıstri Eljan Birtanov.
Osylaısha, Kodeks jobasynda: salaaralyq ózara is-qımyl naqtylandy; skrınıngterden ótý úshin mindetti áleýmettik demalystar kózdeldi; júrgizýshi quqyǵyn alý kezinde alǵashqy kómek kórsetý daǵdylaryn úırený mindeti, qorshaǵan ortanyń halyq densaýlyǵyna áseri, onyń ishinde shý men atmosferalyq aýanyń áseri máseleleri retteldi.
«Qazirgi tańda, jasóspirimder men jastarǵa medıtsınalyq kómek qupııa kórsetilmeıdi. Osyǵan oraı, balalardyń densaýlyǵyn saqtaý máseleleri jáne jasóspirimderdiń óz erkimen medıtsınalyq kómekke júginý múmkindigi eskerildi. «Mektep medıtsınasy» uǵymy zańnamalyq túrde bekitildi», - dedi mınıstr.
Sonymen qatar, psıhıkalyq densaýlyq saqtaý, sýıtsıdtik minez-qulyqtyń, sondaı-aq qumar oıyndardyń profılaktıkasy jónindegi normalar retteldi; bilim berý jáne túsindirý is-sharalaryn ótkize otyryp, tárbıe alýshylar men oqýshylardyń densaýlyǵyn saqtaýǵa ata-analar men pedagogtardy tartý boıynsha normalar reglamentteldi.