Májiliste «Gendi-ınjenerlik qyzmetti memlekettik retteý týraly» zań jobasy tanystyrylymy ótti

Bilim jáne ǵylym vıtse-mınıstri Murat Orynhanovtyń aıtýynsha, elimizde gendi modıfıkatsııalanǵan organızmderdi baqylaý sharasy halyqaralyq talaptarǵa saı emes. «Qalyptasqan jaǵdaı elimizdiń aýmaǵyna osyndaı taýar túrleriniń kóptep enýine múmkindik berip otyr. Gendi modıfıkatsııalanǵan organızmderge qatysty biz qanshama másele kóterip júrgenimizben, bul baǵytta naqty rettelgen sharalar qolǵa alynǵan joq. Bul máseleniń sheshimi gendi modıfıkatsııalanǵan organızmderdiń aınalymyna baqylaý júıesin engizýmen tikeleı baılanysty deýge bolady. Sonymen qatar mundaı júıe engizý óz kezeginde halaqyralyq qujattarda kórsetilgen talaptarǵa sáıkes qadam bolyp tabylady. Osy rette Memleket basshysynyń tapsyrmasy negizinde Bilim jáne ǵylym mınıstrligi «Gendi ınjenerlik qyzmetti memlekettik baqylaý týraly» zańynyń jobasyn daıyndady»,-dedi mınıstrdiń orynbasary.

Onyń sózine qaraǵanda, atalmysh qujatty daıyndaýda 2006 jyly TMD-nyń Parlamentaralyq Assambleıasynda qabyldanǵan gendi modıfıkatsııalanǵan qyzmetpen baılanysty qaýipsizdik jónindegi zańy negizge alynǵan. «Biz tusaýyn kesip otyrǵan zań jobasy elimizde gendi-ıjenerlik qyzmetti damytýǵa baǵyttalǵan»,-dedi Murat Orynhanov.

Onyń sózinshe, gendi modıfıkatsııalanǵan ónimder men organızmderdi jasaý - qazirgi zamanǵy gendi-ınjenerlik qyzmettiń úlken jetistigi. «Genetıkalyq qurylymdardyń quramyn áralýandandyrý arqyly kóptegen elderdiń ǵalymdary adam tutynatyn negizgi ónimderge qorshaǵan ortanyń túrli qolaısyz jaǵdaılaryna tótep bere alatyn qasıet berdi. Osynyń saldarynan atalmysh ónimder dástúrli aýyl sharýashylyǵy ónimderinen áldeqaıda kóp mólsherde ónim beretin boldy. Soǵan qaramastan, gendi modıfıkatsııalanǵan ónimderdi tutyný qalyń kópshiliktiń alańdaýshylyǵyn týdyryp otyr. Sebebi, gendi modıfıkatsııalanǵan ónimderdiń adam densaýlyǵyna áseri áli tolyq zerttelip bitpegen»,-dedi Bilim jáne ǵylym vıtse-mınıstri.