Májiliste Esep komıteti týraly zań jobasynyń tanystyrylymy ótti
ASTANA. Qyrkúıektiń 17-si. QazAqparat /Qanat Mámetqazyuly/ ‑ Búgin QR Parlamenti Májilisinde «Respýblıkalyq bıýdjettiń atqarylýyn baqylaý jónindegi esep komıteti týraly» zań jobasynyń tanystyrylymy bolyp ótti,
dep habarlaıdy QazAqparat.
«Memleket basshysy osydan eki jyl buryn Parlament sessııasyn ashý barysynda memlekettiń qarjylyq baqylaý júıesin nyǵaıtý, onyń ishinde Esep komıtetiniń rólin arttyrý týraly másele kótergen bolatyn. Osyǵan oraı, bıýdjettiń atqarylýyn baqylaý jónindegi Esep komıteti týraly bazalyq zań qabyldaýdyń qajettiligi týyndap, Elbasynyń tapsyrmasyn júzege asyrý úshin Prezıdent Ákimshiligimen is‑sharalar jospary bekitildi. Sonyń negizinde 6 taraý men 26 baptan turatyn «Respýblıkalyq bıýdjettiń atqarylýyn baqylaý týraly» zań jobasy ázirlenip, Parlamenttiń qaraýyna usynylyp otyr», dedi depýtattarǵa tanystyrý rásimin júrgizgen Esep komıtetiniń tóraǵasy Omarhan Óksikbaev.
Onyń aıtýynsha, komıtetke qatysty arnaıy zań qabyldaý osy saladaǵy birqatar mańyzdy qajettilikten týyndaǵan. «Atap aıtqanda, elimizdiń Konstıtýtsııasynda kórsetilgen barlyq memlekettik organdardyń qyzmetteri ózderine qatysty arnaıy zańdarmen retteledi. Osy turǵydan alǵanda, ókinishke qaraı, Esep komıteti elimizdegi ózindik zańnamalyq bazasy joq jalǵyz memlekettik organ bolyp otyr. Tipti joǵary qarjylyq baqylaý organdarynyń basyn quraıtyn EÝROSAI, AZOSAI halyqaralyq uıymdarynyń quramynda da Qazaqstannyń Esep komıteti ózindik zańnamalyq bazasy joq organ bolyp tabylady», dedi O. Óksikbaev.
O. Óksikbaevtiń aıtýynsha, sheteldik joǵary qarjy baqylaý organdarynyń bazalyq zańnamalarynda mindetti túrde atalǵan organnyń qyzmetindegi táýelsizdik pen ashyqtyqty qamtamasyz etetin normalar qamtylǵan. Bunda joǵary qarjy baqylaý organy músheleriniń quqyqtyq mártebesi de qamtylyp, olardyń qarjylyq baqylaý sharasyn júrgizý barysyndaǵy jumysynyń tıimdiligin qamtamsyz etetin normalar kórinis tabady.
