Májiliste erekshe qorǵalatyn tabıǵı aýmaqtarǵa qatysty zań jobasy tanystyryldy
NUR-SULTAN. QazAqparat – Parlament Májilisinde erekshe qorǵalatyn tabıǵı aýmaqtar máselelerine qatysty zań jobasy qaralyp jatyr, dep habarlaıdy QazAqparat tilshisi.
«Erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» zań jobasyn Parlament Májilisinde depýtat Berik Ospanov qorǵady. Zań jobasyn zań shyǵarý bastamasy tártibimen Parlament Májilisiniń depýtattary ázirlegen.
«Zań jobasynyń negizgi maqsaty – buryn týrızm nysandary men erekshe strategııalyq mańyzy bar qurylystardy (sý sharýashylyǵy qurylysjaılary, Memlekettik shekara obektileri, qorǵanys muqtajy) salý jáne olardyń jumys isteýi úshin shyǵarylǵan, maqsaty boıynsha paıdalanylmaıtyn jerdi erekshe qorǵalatyn tabıǵı aýmaqtar jerine qaıtarý», - dedi Berik Ospanov.
Depýtat óz sózin naqtylaı tústi.
«Máselen is júzinde mundaı jaǵdaılar bar. Ol – Býrabaı memlekettik ulttyq tabıǵı parki men Іle-Alataý memlekettik ulttyq tabıǵı parkiniń jerleri. Atalǵan jerlerdiń ıgerilmeýine jáne erekshe qorǵalatyn tabıǵı aýmaqtardyń quramyna kirmeýine baılanysty olar tıisti túrde qorǵalmaıdy. Sonyń saldarynan óziniń biregeıligi men qundylyǵyn joǵaltyp jatyr. Sonymen qatar osy aýmaqtardaǵy ósimdikter men janýarlar dúnıesine zalal keltirilýi múmkin. Budan basqa depýtattar ekologııalyq týrızmdi damytý maqsatynda tabıǵat qorǵaý mekemeleri kórsetetin qyzmetterdiń tizbesin keńeıtýdi usyndy», - dedi ol.
