Májiliste energııa óndirýshi uıymdardyń qaryz máselesi ótkir ekeni aıtyldy
«Memlekt basshysy Qazaqstan halqyna Joldaýynda elimizde jylý kommýnıkatsııasy ınfraqurylymynyń tozyǵy jetkendigin atap ótti. Sonymen qatar Prezıdent Semeı qalasyna barǵan is-saparynda qalanyń ınfraqurylymy óte tozǵandyǵyna toqtalǵan bolatyn. Úkimetke ákimdikpen birlesip Semeıde zamanaýı JEO salý jáne ınfraqurylymdy jańǵyrtý máselesin qaraýdy tapsyrdy. Búginde keıbir óńirlerde jylytý maýsymy bastaldy. Al oǵan daıyndyq ár aımaqta árqalaı bolyp otyr», - dedi B. Torǵaev Premer-Mınıstrdiń birinshi orynbasary Roman Sklıardyń atyna joldaǵan saýalynda.
Sonymen qatar ol elimizdegi qazandyqtardyń isten shyǵýy jıilegenin atap ótti.
«Búginde eldegi óndiris oryndarynda tehnologııalyq protsesterdi jańǵyrtýǵa, onyń ishinde tozǵan jabdyqtardy jańartýǵa ınvestıtsııa men qarajat jetkiliksiz bólinedi. Budan bólek, jaqynda Úkimette jylý berý maýsymyna daıyndyq máselelerin talqylaý barysynda birqatar óńirde negizgi jabdyqtardy jóndeý merzimderi oryndalmaı jatqany anyqtalǵan. Ásirese, 5 stantsııada kómirdiń normatıvtik qory sáıkes kelmeıtindigi baıandaldy», - dedi depýtat.
Onyń sózine qaraǵanda, energııa óndirýshi uıymdardyń otyn úshin kredıtorlyq bereshegi máselesi ózekti bolyp tur. Qazirgi kezde «QazTransGaz-Aımaq» AQ aldyndaǵy bereshek 7 mlrd 353 mln teńgeni quraıdy. Sondaı-aq energııa óndirýshi uıymdardyń «Bogatyr-Kómir» JShS aldynda jalpy somasy 2 mlrd 629 mln teńge bereshek bar.
«Osylardy eskere otyryp, eldegi jylytý maýsymy boıynsha tolyq aqparatty qamtyp, osy máselelerge jaýap berýińizdi suraımyn. Óńirlerde kúzgi-qysqy jylytý maýsymyna daıyndyǵy qandaı kúıde? Áleýmettik nysandar bekitilgen kestege saı jylýmen qamtamasyz etildi me? Búgingi kúni elimizdegi JEO-dyń jumys isteý barysy qalaı? Qoımalar men stantsııalarda kómir men mazýttyń normatıvtik qory bıylǵy jylytý maýsymyna qanshalyqty jetkilikti?», - dep surady Bekqalı Torǵaev.
