Májiliste elimizdiń qylmystyq zańnamalaryn izgilendirýge baǵyttalǵan qujattyń tanystyrylymy ótti
ANA. 4 qarasha. QazAqparat /Aıdar Ospanalıev/ - Búgin Parlament Májilisinde Májilis tóraǵasynyń orynbasary Vladımır Bobrov pen Bas prokýror Qaırat Mámıdiń qatysýymen «Qazaqstan Respýblıkasynyń keıbir zańnamalyq aktilerine qylmystyq zańnamany odan ári izgilendirý jáne qylmystyq protsestegi zańdylyqtyń kepildikterin kúsheıtý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy ótti.
Otyrysta atalmysh qujattyń maqsat-mindetteri týrasynda sóz qozǵaǵan májilistiń Zańnama jáne sot-quqyqtyq reforma komıtetiniń tóraǵasy Rahmet Muqashevtiń sózine qaraǵanda, zań jobasy Memleket basshysynyń quqyq qorǵaý qyzmeti men sot júıesiniń tıimdiligin arttyrýǵa qatysty Jarlyǵyn oryndaý maqsatynda ázirlendi. «Bul óte mańyzdy ári ózekti máselelerdi qamtıtyn qujat. Sondyqtan biz Bas prokýratýramen birlese otyryp, ony qalyń kópshilikpen jan-jaqty talqylap, tereń zerttelgen zań daıyndap shyǵý maqsatynda qujattyń tanystyrylymyn ótkizý qajet dep taptyq», -dedi komıtet tóraǵasy.
Onyń sózinshe, elimizdiń Qylmystyq kodeksi 1997 jyldan beri, ıaǵnı zań qabyldanǵaly osynshama aýqymdy kólemde ózgertilgen emes. Zań jobasy Qylmystyq kodekstiń 200-deı baptaryna ózgeris engizýdi qarastyrady. «Jalpy elimizdiń zańdaryn izgilendirý qylmystyq zańnamalardy ońtaılandyrý jumystary elimizde alǵash ret qolǵa alynyp otyrǵan joq. Elimiz táýelsizdigin alǵan jyldardan beri bul baǵytta memleket tarapynan aldyn ala josparlanǵan salmaqty da salıqaly saıasat júrgizildi. Búgingi qujat osy baǵyttaǵy jumystardyń zańdy jalǵasy»,- dedi depýtat.
Otyrysta zań jobasy arqyly engiziletin ózgerister jóninde Bas prokýrordyń birinshi orynbasary Iogan Merkel baıandady. Onyń sózinshe, qujatta qylmystyq zańnamany lıberalızatsııalap,
qoǵam úshin asa qaýipti emes qylmys jasaǵan azamattardy bas bostandyǵynan aıyrǵannan kóri olarǵa aıyppul salyp nemese ákimshilik jaýapqa tartýdy qarastyrady. Sondaı-aq onda qylmystyq jaýapkershilik sharalaryn azamattardyń bostandyqtaryn shekteý, qoǵamdyq jumysqa tartý túrinde jeńildetý máseleleri qarastyrylǵan.
Májiliste depýtattar zań jobasynyń jekelegen baptaryna qatysty ózderiniń usynystaryn bildirip, pikir talastyrdy.
