Májiliste «Elektrondyq úkimetti» damytýǵa baılanysty zań jobasynyń tanystyrylymy ótti
dep habarlaıdy QazAqparat.
Otyrys barysynda atalmysh qujat boıynsha baıandamany Aqparattandyrý jáne baılanys agenttiginiń tóraǵasy Qýanyshbek Esekeev jasady. Onyń sózine qaraǵanda, elektrondyq memlekettik qyzmet kórsetetin sýbektilerdiń jumys tártibin retteıtin atalmysh qujatta osy qyzmetterdi júzege asyrý tártibi egjeı-tegjeıli reglamentteletin bolady.
Zań jobasy kúshine enetin bolsa, ol elimizdiń «Elektrondyq úkimet» júıesin túbegeıli jetildirýge yqpal etedi. Atap aıtqanda, qujat talaptary boıynsha ákimshilik protsedýralar ońtaılandyrylyp, elektrondyq memlekettik qyzmet kórsetý salasyndaǵy memlekettik basqarý qyzmetiniń tıimdiligi artady. Sonymen qatar, elektrondyq qyzmet salasynyń ashyqtyǵy qamtamasyz etilip, turǵyndar tarapynan túsetin shaǵymdar sany azaıady jáne osy saladaǵy qyzmetkerlerge júkteletin mindetter kólemi kemıdi.
Otyrys barysynda halyq qalaýlylary qujat talaptary boıynsha ózderiniń usynys-pikirlerin bildirip, «Elektrondyq úkimet» jumysyna baılanysty qalyptasqan máselelerdi de talqyǵa saldy.
