Májiliste Elbasy týraly kitaptyń tusaýy kesildi
Kitaptyń avtory - Májilis depýtaty, «Qazaqstan ardagerleri» qaýymdastyǵynyń tóraǵasy, memleket jáne qoǵam qaıratkeri, jazýshy, aqyn Baqytbek Smaǵul.
Іs-shara «Tuńǵysh Prezıdent kúni» jáne «Táýelsizdik kúni» memlekettik merekelerine oraı ótkizilip otyr.
Tusaýkeser rásimine Májilis Tóraǵasynyń orynbasary Gúlmıra Isımbaeva, Senat Tóraǵasynyń Orynbasary Bektas Beknazarov jáne qos palata depýtattary men zııaly qaýym ókilderi, úkimettik emes uıymdardyń jetekshileri qatysty.
B.Smaǵuldyń kórkem tilmen jazylǵan bul eńbegi iri 7 taraýdan turady. Ár taraý Elbasy-Qazaqstannyń Tuńǵysh Prezıdenti Nursultan Ábishuly Nazarbaev tulǵasynyń jeti qyryna arnalǵan. Atap aıtqanda, «Táýelsizdik - máńgilik úshin kúres keńistigi» taraýynda Elbasynyń jańa qazaqstandyq memlekettiliktiń negizin qalaýshy retindegi tarıhı róli ashylady.
Kitaptyń avtory atap ótkendeı, «Elbasy shapaǵaty» taraýynda N. Nazarbaevpen kezdesken 1984 jyldan bergi estelikteri, Memleket basshysynyń soǵys ardagerlerine qamqorlyǵy týraly baıandalady.
«Elbasy - jańa ultty qalyptastyrǵan fenomen» atty taraýda memleketquraýshy qazaq ultynyń aınalasynda uıysqan Qazaqstan halqyn - «Bolashaǵy birtutas ultty» túzý kezeńderi men sol joldaǵy qıynshylyqtar naqty oqıǵalar negizinde saralanady.
«Astana - jańǵyrýdyń rámizi» taraýy elordany jarııalaý jáne turǵyzý kezeńinde bolǵan, biraq buǵan deıin el nazarynan tasada qalyp kelgen tosyn oqıǵalar men tyń derekterge qurylǵan.
«Ómir shynaıylyǵyn ózgertken lıder» taraýynda B.Smaǵul áskerı sarapshy retinde Qazaqstan Prezıdentiniń dúnıejúzindegi ártúrli qaqtyǵys oshaqtarynyń óship, turǵyndarynyń beıbit ómirge oralýyna yqpal etken bitimger beınesin sózben somdaıdy.
«Azshylyq ultty alypqa aınaldyrǵan» taraýynda halqynyń sany az bolǵanymen, álemdik kóshbasshy memleketke aınalǵan damyǵan elder tájirıbesi saraptalady. Sondaı-aq «Ult Atasy» atanǵan tarıhı lıderler qatarynda sanalatyn N.Nazarbaevtyń Qazaqstandy ozyq «otyzdyq» qataryna qosý strategııasynyń mán-mańyzy ǵylymı taldanady.
«Prezıdentke baǵyný - jaǵyný emes, saıasatyn qoldaý - tabyný emes» qorytyndy taraýynda Tuńǵysh Prezıdenttiń «Rýhanı jańǵyrý» baǵdarlamasyna jáne sodan órbıtin máselelerge mán beriledi. Baqytbek Smaǵul óziniń uzaq jyldardaǵy oı-tolǵanysynyń jemisi bolyp tabylatyn bul eńbeginde Elbasy atymen ushtasqan «Eldiktiń Altyn Ǵasyryna» qatysty betburystardyń tek kýágeri ǵana emes, tikeleı qatysýshysy retinde dáýir rýhyn, qazirgi zaman beınesin ǵylymı negizde, biraq oı men til órnegin tóge otyryp, asa qyzyqty sýretteıdi.
Kitap qalyń oqyrmanǵa, ár sala mamandaryna, sondaı-aq bolashaq «nazarbaevtanýshylarǵa» ornyqty oı, dáıekti derek, taǵylymdy túıin, ulaǵatty uıǵarym usynady.
