Májiliste el óńirlerinde sýmen qamtamasyz etý máselesi kóterildi
NUR-SULTAN. QazAqparat – Májilistiń jalpy otyrysynda depýtat Asqarbek Úısimbaev sýmen jabdyqtaý máselesine qatysty Úkimet basshysynyń orynbasary Roman Sklıardyń atyna saýal joldady, dep habarlaıdy QazAqparat tilshisi.
«Nur Otan partııasynyń «Ózgerister joly: Ár azamatqa laıyqty ómir!» atty saılaýaldy baǵdarlamasyn oryndaý jónindegi Jol kartasynyń 277-tarmaǵynda 2025 jylǵa deıin qalalar men aýyldardyń turǵyndaryn sýmen jabdyqtaý qyzmetterin 100% qol jetkizýmen qamtamasyz etý kózdelgen. 2021 jylǵy respýblıkalyq bıýdjetti naqtylaý qorytyndysy boıynsha 350 jobany iske asyrýǵa 151,4 mlrd teńge bólingen, onyń ishinde: qalalar boıynsha – 92 jobaǵa 77,3 mlrd teńge, aýyldar boıynsha 258 jobaǵa 74,1 mlrd teńge qaralyp otyr. 2021 jyldyń qorytyndysy boıynsha sýmen jabdyqtaý qyzmetterine qoljetimdilikti qalalarda - 98%, aýyldarda – 91,8% jetkizý josparlanýda», - dedi A. Úısimbaev.
Onyń aıtýynsha, is júzinde óńirlerge, ásirese aýyldyq jerlerge sapar barysynda bul máseleniń áli de ózekti bolyp otyrǵany kórinip tur. Qazirgi ýaqytta aýyz sýmen qamtamasyz etý kórsetkishteri jáne tutastaı alǵanda sýmen jabdyqtaý júıeleriniń, ásirese aýyldarda, sıpattamalary burynǵysynsha qanaǵattanarlyqsyz kúıde.
«Sonymen qatar, bizdi alańdatyp otyrǵan másele – kóptegen shaǵyn qalalar men aýyldarda aýyz sý sapasynyń tómendigi, magıstraldyq jeliler jabdyqtarynyń tozýynan sý jetkizýge kedergi keltirilýi. Sý – kóptegen jerlerde tutynýǵa múldem jaramsyz, sapasy baǵasyna sáıkes kelmeıdi. Osyǵan baılanysty turǵyndar dúkenderden bótelkedegi sýdy satyp alýǵa nemese súzgilerdi ornatýǵa májbúr. Sondaı-aq, sý qabyldaý stantsııalarynda elektr qýatyn ajyratqan kezde, turǵyndar únemi aýyz sýsyz qalady. Al, joǵarǵy qabattarda turatyn turǵyndar sýdyń tómen qysymyna shaǵymdanady, nátıjesinde sýdy tek túnde paıdalanýǵa májbúr bolady. Sondaı-aq, Almaty jáne Túrkistan oblystarynyń aýyldyq eldi mekenderinde jáne elimizdiń batys óńirlerinde de aýyz sýmen qamtamasyz etý problemasy ótkir bolyp tur», - dedi depýtat.
Onyń sózine qaraǵanda, sýmen jabdyqtaý jáne káriz tarıfteri boıynsha da suraqtar týyndaıdy.
«Joǵarydaǵy máselelerge baılanysty jáne Memleket basshysynyń aýyldyq eldi mekenderdi aýyz sýmen qamtamasyz etý máselesin tolyq sheshý tapsyrmasyn múltiksiz oryndaý maqsatynda Ulttyq jobada tıisti is-sharalardy qarastyrý qajet dep esepteımiz:
elimizdiń qalalarynda jańa turǵyn úı keshenderin salýdy ulǵaıtýǵa baılanysty qýattyń jetispeýshiligi problemasyn sheshý, avarııalyq jaǵdaıdaǵy jelilerge monıtorıng júrgizý jáne tehnıkalyq eskirgen, tozǵan jabdyqtar men sý qubyry jelilerin aýystyrýdy qamtamasyz etý, sýmen jabdyqtaýdyń ózindik qunyn tómendetetin tıimdi jumystar júrgizip, óńirlerde tutynylatyn sý tarıfterin retteý, jerasty tuşy sý kózderin anyqtaý úshin geologııalyq barlaý jumystaryn júrgizý», - dedi Asqarbek Úısimbaev.
