Májiliste EAEO-ǵa Armenııanyń qosylýyna qatysty qujat maquldandy

NUR-SULTAN. QazAqparat – Parlament Májilisiniń jalpy otyrysynda «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Armenııa Respýblıkasynyń qosylýy týraly 2014 jylǵy 10 qazandaǵy shartqa ózgerister engizý týraly hattamany ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Armenııa Respýblıkasy 2015 jylǵy 1 qańtarda Eýrazııalyq ekonomıkalyq odaqqa múshe boldy.

«Eýrazııalyq ekonomıkalyq odaqqa kirý jónindegi kelissózder nátıjesinde Armenııa Respýblıkasyna qosylǵan sátten bastap 7 jyl ishinde 981 taýarǵa qatysty neǵurlym tómen kedendik ákelý bajdaryn qoldaný múmkindigi berildi. Bul et, jarma, hımııalyq ónimder, avtomobılder, dári-dármekter, jabdyqtardyń, quraldardyń jáne asyl tastardyń keıbir túrleri. Bul rette osy tizbeni jyl saıyn qysqartý kózdelgen. Armenııaǵa berilgen ótpeli kezeń 2022 jyly aıaqtalady. 2019 jylǵy jeltoqsanda Joǵary Eýrazııalyq ekonomıkalyq keńes barysynda Armenııa Respýblıkasynyń Premer-Mınıstri Biryńǵaı kedendik tarıfke kóshý kezeńin uzartý týraly ótinishpen júgindi. Armenııa Respýblıkasynda qalyptasyp otyrǵan ekonomıkalyq jaǵdaıdy eskere otyryp, Eýrazııalyq ekonomıkalyq odaqtyń qalǵan memleketteri neǵurlym tómen bajdardy qoldaný múmkindigin 1 jylǵa uzartýǵa kelisti», - dedi QR Saýda jáne ıntegratsııa mınıstri Baqyt Sultanov.

Onyń aıtýynsha, ótpeli kezeń 553 taýarǵa qatysty uzartyldy.

Kólik tobyna qatysty ótpeli kezeń uzartylmady jáne 2020 jylǵy 1 qańtarda aıaqtaldy.