Májiliste EAEO aıasynda kedendik tekserýge qatysty qujat maquldandy
«Armenııa Respýblıkasyndaǵy zańnamalyq ózgeristerge baılanysty Armenııa Respýblıkasy shartqa ózgerister engizý týraly máselege bastamashylyq jasady. Túzetýler laýazymdy tulǵalar tizbesi boıynsha kedendik jete tekserýge qatysty. Bul laýazymdy tulǵalar ataýlarynyń zańnamalyq ózgeristerine baılanysty», - dedi QR Ulttyq ekonomıka mınıstri Rýslan Dálenov.
«Halyqaralyq sharttar týraly» zańǵa sáıkes Hattama ratıfıkatsııalaýǵa jatady.
«Hattamany ratıfıkatsııalaý teris áleýmettik-ekonomıkalyq jáne quqyqtyq saldarǵa ákep soqtyrmaıdy», - dedi mınıstr.
Qaralyp otyrǵan 2017 jylǵy 11 sáýirdegi Eýrazııalyq ekonomıkalyq odaqtyń Keden kodeksi týraly shartqa ózgerister engizý týraly hattamaǵa 2019 jylǵy 29 mamyrda Nur-Sultan qalasynda qol qoıyldy.
Hattama Eýrazııalyq ekonomıkalyq odaqtyń Keden kodeksine múshe memleketter úkimetteriniń basshylaryna, Armenııa Respýblıkasy Premer-Mınıstri Ákimshiliginiń basshysyna, sondaı-aq Armenııa Respýblıkasy Premer-Mınıstri kúzet qyzmetiniń bastyǵyna qatysty keden organdarynyń kedendik baqylaýdyń belgili bir nysandaryn qoldanýdan bosatýdy belgileý bóliginde ózgerister engizýdi kózdeıdi. Armenııa Respýblıkasynyń jańa Konstıtýtsııasynyń qabyldanýyna baılanysty bul máselege Armenııa Respýblıkasy 2017 jylǵy 22 tamyzda komıssııa keńesiniń otyrysynda bastamashylyq etti.
