Májiliste dinı qyzmet jáne dinı birlestikterge qatysty zań jobasy tanystyryldy
TANA. 8 qyrkúıek. QazAqparat - Búgin Májiliste «Dinı qyzmet jáne dinı birlestikter týraly» zań jobasynyń tanystyrylymy bolyp ótti Sonymen qatar «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» zań jobasy da tanystyryldy,
dep habarlaıdy QR Parlamenti Májilisiniń baspasóz qyzmeti.
Bul sharany Májilistiń Zańnama jáne sot-quqyqtyq reforma komıteti uıymdastyryp otyr. Atalǵan komıtettiń tóraǵasy Rahmet Muqashev kirispe sózinde Májiliske dinge qatysty zań jobalary kelip túskenin, onyń bizdiń qoǵamdaǵy mańyzdylyǵy joǵary ekenin atap ótti. «Zań jobasynyń maqsaty - dinı birlestikter qyzmetiniń jáne azamattardyń dinı qyzmetiniń negizgi baǵyttaryn quqyqtyq retteý»,- dedi R.Muqashev.
QR Din isteri agenttiginiń tóraǵasy Lama Sharıf Qaırat Qaıyrbekuly atalǵan zań jobalary boıynsha baıandama jasady.
«Atalmysh zań jobalaryn ázirleý memleket Basshysynyń 2006 jylǵy 25 shildedegi Jarlyǵymen bekitilgen 2006-2011 jyldarǵa arnalǵan Azamattyq qoǵamdy damytý tujyrymdamasynda qarastyrylǵan»,- dedi Qaırat Lama Sharıf. Zań jobasy ár túrli zańnamalyq aktilerdiń quqyq normalary arasyndaǵy qaıshylyqtardy, kemshilikter men tartysty jaıttardy joıý jolymen jetildirý maqsatyn kózdeıdi.
Baıandamashynyń aıtýynsha, qarastyrylyp otyrǵan zań jobasy qoǵamdyq jáne dinı múddelerdiń tepe-teńdigin saqtaýǵa baǵyttalǵan. Dinı senim bostandyǵy salasyndaǵy memlekettik saıasattyń úsh negizgi qaǵıdattaryn aıryqsha bólip kórsetý kerek, olar - beıtaraptyq, toleranttylyq jáne teńdik. Bul rette eń basty másele memlekettiń dinı birlestikterdiń ishki isterine aralaspaý jónindegi beıtaraptyǵy bolyp tabylady. Toleranttylyq qaǵıdaty dinı senimderge degen qurmetti bildiredi. Teńdik qaǵıdaty barlyq dinı birlestikterdiń jáne ártúrli dinı senim ókilderiniń zań aldyndaǵy teńdigin qamtamasyz etedi.
Otyrysta QR Din isteri agenttiginiń tóraǵasy Lama Sharıf Qaırat Qaıyrbekuly atalǵan zań jobalary boıynsha depýtattardyń qoıǵan suraqtaryna jaýap berdi. Birqatar depýtattar óz usynystary men pikirlerin bildirdi. Endi zań jobalary jumys tobynyń otyrystarynda talqyǵa túsetin bolady.
Zań jobasy boıynsha qurylǵan jumys tobyna Májilistiń Zańnama jáne sot-quqyqtyq reforma komıtetiniń múshesi Ramazan Sárpekov jetekshilik jasaıdy.
