Májiliste depýtattar bıznesti qoldaý týraly aıtty
«2020 jylǵy 1 qyrkúıekte Prezıdent Qazaqstan halqyna Joldaýynda shaǵyn jáne orta bızneske qosymsha kómek retinde ekonomıkanyń zardap shekken salalaryndaǵy ShOB-tyń barlyq qoldanystaǵy nesıeler boıynsha paıyzdyq stavkalardy jyldyq 6 paıyzǵa deıin memlekettik sýbsıdııalaýdy qamtamasyz etýdiń qajettigi týraly atap ótti. «Aq jol» fraktsııasy osyndaı sheshimdi tolyqtaı qoldaıdy», - dep toqtaldy depýtat Azat Perýashev QR Úkimet basshysy Asqar Mamınniń atyna joldaǵan depýtattyq saýalynda.
Budan bólek depýtat 2020 jylǵy 2 qyrkúıektegi Úkimet otyrysynda Qarjy naryǵyn retteý jáne damytý agenttiginiń tóraıymy Mádına Ábilqasymova qarjylyq qoldaý sharalary boıynsha qazirgi jaǵdaıdy baıandaǵanyn eske saldy.
«Baıandamada atalyp ótkendeı, 2020 jylǵy 1 shildedegi jaǵdaı boıynsha sýbsıdııalanatyn nesıeler boıynsha ortasha stavka shamamen 15 paıyzdy quraıdy. Sonymen birge, agenttik basshysy ekinshi deńgeıli bankterdiń joǵary stavkasyn sýbsıdııalanatyn nesıeler turǵysynda jyldyq 20 jıyrma paıyzdan tómen emes mólsherde belgileýdi usyndy», - dedi depýtat.
Onyń sózine qaraǵanda, osy joly memlekettik qoldaýdyń eleýli úlesi kásipkerlerge emes, bankterdiń kirisin arttyrýǵa baǵyttalǵaly tur.
«Aqjol» fraktsııasy depýtattary tarapynan osy usynysqa qatysty saýal týyndap otyr. Eger ekinshi deńgeıli bankter shaǵyn jáne orta bıznes sýbektilerine jyldyq 20 paıyz stavkasy boıynsha nesıe berse, olar osy arqyly joǵary marjany qamtyp otyr. ShOB-tyń jappaı qıyn jaǵdaıǵa tap bolýy jaǵdaıynda olardyń tábetin shekteýdiń ornyna, memleket budan ary qaraı da osy suranystaryn qanaǵattandyrmaq. Qazirgi jaǵdaıda bıznes te, memleket te tıisti shyǵynǵa tap bolyp otyr. Eshteńe bolmaǵandaı, tek bankter ǵana burynǵydaı qomaqty tabys jasaǵysy kelýde», - dedi depýtat.
Onyń paıymynsha, qaryz alýshylardyń kóbisi nesıe tóleýge qaýqarsyz bolyp turǵan kezde, ekinshi deńgeıli bankterdiń suranysyn qanaǵattandyrý usynysy tyıylmaı tur.
Joǵaryda atap ótilgendi eskere otyryp, «Aq jol» depýtattyq fraktsııasy Úkimetke memlekettik múdeni qoldaýǵa qatysty tıisti usynysty jasady. Bul turǵyda shaǵyn jáne orta bıznesti qoldaýǵa arnalǵan ońtaıly qadamdardy iske asyrý qajettigi aıtyldy.
