Májiliste demografııa turǵysyndaǵy otbasylyq saıasat máseleleri talqylandy
ASTANA. Mamyrdyń 25-i. QazAqparat /Qanat Mámetqazyuly/ - Búgin QR Parlamenti Májilisinde «Demografııalyq ózgerister turǵysyndaǵy otbasy saıasatynyń negizgi tujyrymdary men halyqaralyq úrdister» taqyrybynda dóńgelek ústel jıyny bolyp ótti. Sharany Parlament Májilisiniń Áleýmettik-mádenı damý komıteti men «Nur Otan» HDP fraktsııasy janyndaǵy Áleýmettik keńes uıymdastyryp otyr,
dep habarlaıdy QazAqparat.
Sharanyń basty maqsaty - elde qalyptasqan demografııalyq úrdisterdi, turǵyndardyń reprodýktıvti densaýlyǵy men ustanymdaryn, bala týýdy kóbeıtý maqsatynda otbasylardy qoldaýǵa baǵyttalǵan memlekettik saıasatty talqylaý.
«Jalpy, búkil bir memlekettiń ahýalynyń jaqsarýy sonda meken etetin otbasy jaǵdaıynyń jaqsarýyna tikeleı baılanysty. Al salaýatty otbasy - salaýatty qoǵamnyń kepili. Osy máselege Memleket basshysy únemi nazar aýdaryp keledi. Máselen, Elbasy óz Joldaýynda 2020 jylǵa deıin halyq sanyn 10 paıyzǵa arttyrý qajettigin aıtyp, elimizdegi ómir súrý uzaqtyǵyn 72 jasqa deıin arttyrýǵa qol jetkizý týraly tapsyrma júktedi. 2020 jylǵa deıingi Strategııalyq damý josparyna sáıkes, halyq sanynyń ósimi eń aldymen tabıǵı kóbeıý men ońtaıly kóshi-qon saıasaty esebinen oryn alýy kerektigi qamtylyp otyr», dedi jıyndy ashyp sóz sóılegen Májilis depýtaty, Áleýmettik keńes tóraıymy Aıtkúl Samaqova.
Jıyn barysynda QR Prezıdenti janyndaǵy Áıelder isi jáne otbasylyq-demografııalyq saıasat jónindegi Ulttyq komıssııa tóraıymy Gúlshara Ábdihalyqova otbasylardy qoldaý sharalary jóninde baıandady. Sonymen birge, otyrystyń qorytyndysy boıynsha otbasylardyń jaǵdaıy men olardyń mártebesin nyǵaıtý, eldiń demografııalyq ahýalyn jaqsartýǵa baǵyttalǵan usynystar qabyldandy.
