Májiliste dári-dármekke shekti baǵany belgileıtin zań jobasy talqylandy
ASTANA. QazAqparat - Májilis Spıkeri Nurlan Nyǵmatýlınniń tóraǵalyǵymen ótken palatanyń búgingi jalpy otyrysynda depýtattar dárilik zattar men medıtsınalyq buıymdardyń aınalysy máselelerine qatysty zań jobasyn talqylady, dep habarlaıdy QazAqparat QR Parlamenti Májilisiniń baspasóz qyzmetine silteme jasap.
Májilis tóraǵasy bul qujat qazaqstandyqtardy qoljetimdi baǵamen jáne sapaly, tıimdi, qaýipsiz dárilermen qamtamasyz etýge baǵyttalǵan asa mańyzdy qujat ekenin aıtty.
Osy oraıda Májilis spıkeri: «Búgin biz óte mańyzdy jáne óte qajetti zań jobasyn maquldadyq. Sebebi, bul zań jobasynyń áleýmettik mańyzy óte zor. Barshańyz jaqsy bilesizder, dáriler baǵasyn zań deńgeıinde retteý - Elbasymyzdyń tikeleı tapsyrmasy. Sondyqtan, bul zań kúshine engen kezde, dárilerdiń qoljetimdi bolýyna jáne baǵanyń da turaqty bolýyna jańa serpin berýge tıis. Sol úshin ekinshi oqylymǵa deıin taǵy da jan-jaqty qarap, osy talapqa saı zań daıyndaýymyz kerek»,- dedi.
Zań jobasynda aldaǵy jyldan bastap, dárilik zattardyń shekti baǵalaryn bekitý arqyly barlyq dári-dármekterdiń qunyn retteý men basqa da maqsattar kózdelip otyr.
Aıta keteıik, osy másele boıynsha depýtattyq korpýs birshama jumystar atqardy. Máselen, taqyryp tóńireginde komıtettiń, jumys toptarynyń arnaıy otyrystary ótip, dárilik qamtamasyz etý boıynsha parlamenttik tyńdaý ótti. Onda aıtylǵan usynys, pikirlerdiń barlyǵy zań jobasyn daıyndaý barysynda eskerilgen.
