Májiliste daǵdarysqa qarsy sharalardy iske asyrý men energııa únemdeý taqyrybynda Úkimet saǵaty ótýde
dep habarlaıdy QazAqparat.
«Tabıǵı monopolııalardy retteý agenttigi qazirgi kezde 1 myń 543 retteletin qyzmetterdi júzege asyrady. Bunyń ishinde sý kárizi júıeleriniń salasynda - 808 qyzmet, elektr energetıkasy salasynda - 447 qyzmet, munaı men gazdy tasymaldaý salasynda - 51 qyzmet, kólik salasynda 230 retteletin qyzmet kórsetetin 1 myń 14 tabıǵı monopolııa sýbektisiniń qyzmeti tarıftik jáne tehnıkalyq retteýge jatady. Budan basqa, agenttik 400 domınant sýbekt jáne 15 memlekettik monopolııa sýbektisi boıynsha baǵa belgileý fýnktsııalaryn da júzege asyrady», dedi Nurlan Aldabergenov. Tóraǵanyń aıtýyna qaraǵanda, Agenttik sýmen jabdyqtaý, temir jol kóligindegi is júzinde búkil salany, elektr energetıkasy, jylýmen jabdyqtaý salasynda qyzmetterdiń túpkilikti qunynyń 40-60 paıyzǵa jýyǵyn retteýdi júzege asyryp otyr.
«Úkimet alǵa qoıǵan mindetterge sáıkes, Agenttik iske asyryp otyrǵan tarıftik saıasattyń negizgi baǵyttary daǵdarysqa qarsy sharalardy iske asyrý jáne energııany únemdeý bolyp tabylady. Osy rette Agenttik daǵdarysqa qarsy sharalardyń basym baǵyttaryn anyqtaǵan bolatyn. Atap aıtqanda, bul baǵytta ortasha jáne uzaq merzimdi tarıfter boıynsha jumys isteıtin tabıǵı monopolııa sýbektileriniń sanyn ulǵaıtý, shıkizat pen materıaldar shyǵysynyń normalaryn ońtaılandyrý, ákimshilik shyǵystardy qysqartý jumystaryna basa nazar aýdarylady. Sonymen birge, agenttik óziniń basym mindeti retinde energııany únemdeý jumystaryn da jetildire túspek. Bul rette energııa men sýdyń normatıvten tys ysyraptaryn joıý, elektr energııasyn tutyný kólemine qaraı saralanǵan tarıfterdi engizý basty maqsatqa aınalyp otyr», dedi N. Aldabergenov.
