Májiliste bızneske júktemeni azaıtýǵa baǵyttalǵan qujat maquldandy
«Kásipkerlikti memlekettik retteýdiń tıimdiligi memleket pen bıznestiń ózara is-qımylynyń jańa qaǵıdattaryn iske asyrý arqyly qamtamasyz etiletin bolady. Bul rette talaptardy belgileý sharttaryn saqtaý, kásipkerlik sýbektileri úshin negizsiz retteýshilik talaptardy engizýge jol bermeý, memlekettik retteýdiń júıeliligi men dáıektiligi, buryn qabyldanǵan sheshimderdiń sabaqtastyǵy, sondaı-aq memlekettiń kásipkerlik sýbektilerine degen senimin arttyrý eskerilgen. Ózara is-qımyldyń bazalyq qaǵıdattaryn jetildirý - kásipkerlik sýbektileriniń memleketke senimin jáne bıznes-ortany retteýdiń tıimdiligin arttyrýǵa múmkindik beredi. Artyq talaptardyń ósýin boldyrmaý jáne tıimsiz talaptardy alyp tastaý maqsatynda bızneske qoıylatyn talaptardy belgileý sharttary zańnamalyq túrde aıqyndalatyn bolady», - dedi Ulttyq ekonomıka mınıstri Áset Erǵalıev.
Onyń aıtýynsha, «bir talapty qossa, eki talapty alyp tastaý» qaǵıdatyn engizý qoldanystaǵylardyń ekeýiniń ornyna bir retteýshilik talapty engizýdi kózdeıdi. Osylaısha, memleket jańa talapty engizgen kezde quqyqtyq retteýdiń sol salasynda qoldanylatyn eki talap joıylady. Bul qaǵıdat kásipkerlik sýbektileri úshin artyq retteý men ákimshilik shyǵyndardy qysqartýǵa múmkindik beredi.
«Normatıvtik quqyqtyq aktiler jáne ózge de qujattar túrinde bızneske arnalǵan talaptardyń tolyq tizbesin qamtıtyn biryńǵaı aqparattyq resýrsty qalyptastyrý maqsatynda mindetti talaptardyń Tizilimin qurý kózdeledi. Tizilimge jańa retteýshilik saıasatqa sáıkes keletin talaptar ǵana engizilýge jatady. Budan basqa, Tizilimde normatıvtik quqyqtyq aktilerdiń jańa retteýshilik saıasatqa sáıkestigin qaraý merzimderi aıqyndalatyn bolady. Demek olar sáıkes kelmegen jaǵdaıda quqyqtyq aktiler qaıta qaralady nemese joıylady. Bul qaǵıdat qaýipsizdiktiń qajetti deńgeıin qamtamasyz etetin mindetti talaptardyń sanyn ońtaılandyrýǵa, bızneske qatysty normatıvtik quqyqtyq aktiler bazasyn jetildirýge yqpal etetin bolady», - dedi mınıstr.
«Kásipkerlik qyzmetti retteýdegi jańa tásilderdi iske asyrý bızneske júktemeni túbegeıli azaıtýǵa jáne jańa ekonomıkalyq naqty jaǵdaıda iskerlik belsendilikti damytýǵa serpin berýge múmkindik jasaıdy», - dedi ol.
Aıta keteıik, osy zań jobasyn birinshi oqylymda talqylaý kezinde Májilis tóraǵasy Nurlan Nyǵmatýlın qujatty pysyqtaý barysyndaǵy Ulttyq ekonomıka mınıstrliginiń qadamdaryn synǵa aldy.