Májiliste bıologııalyq qaýipsizdik máseleleri talqylanyp jatyr
«Jetinshi saılanǵan Májilistiń ekinshi sessııaǵa arnalǵan ókilettikterin iske asyrý jónindegi negizgi is-sharalar josparyna sáıkes Áleýmettik-mádenı damý komıteti «Qazaqstan Respýblıkasynyń bıologııalyq qaýipsizdigi týraly» zań jobasyn talqylaý boıynsha «dóńgelek ústel» otyrysyn ótkizip otyr. Memleket basshysy Qasym-Jomart Kemeluly Toqaev
VII saılanǵan Qazaqstan Respýblıkasy Parlamentiniń ekinshi sessııasynyń ashylýynda bizdiń aldymyzǵa Eldiń bıologııalyq qaýipsizdigin boljaýdyń ulttyq júıesin qurý mindetin qoıdy. Ol «Qazaqstan Respýblıkasynyń bıologııalyq qaýipsizdigi týraly» zań jobasynda kózdelgen. Búgin dóńgelek ústelde talqylanyp otyrǵan zań jobasy Qazaqstanda alǵash ret eldegi bıologııalyq qaýipsizdikti qamtamasyz etý, halyqty, janýarlardy, ósimdikterdi jáne qorshaǵan ortanyń basqa da obektilerin bıologııalyq faktorlardyń áserinen qorǵaý salasynda biryńǵaı memlekettik retteý júıesin qurý boıynsha zańnamalyq baza qalyptastyrýdyń negizi bolyp otyr. Bul bizdiń elimiz úshin asa mańyzdy, óıtkeni Qazaqstanda, ókinishke qaraı, Qyrym-Kongo gemorragııalyq qyzbasynyń, obanyń, kene entsefalıtiniń jáne basqa da asa qaýipti ınfektsııalardyń tarıhı qalyptasqan ári belsendi tabıǵı oshaqtary bar», - dep toqtaldy Darhan Myńbaı.
Onyń aıtýynsha, búgingi kúni elimizge onsha tanymal emes ınfektsııalar men vırýstardyń ený qaýpi aldyn ala jedel áreket etý sharalaryn qabyldaýdy qajet etip otyrǵan kezde, ol eldiń bıoqaýipsizdigin boljaýdyń birtutas modelin qurmaı, ony iske asyrý múmkin emes.
«Bul úshin zań jobasy aıasynda bıologııalyq qaýipsizdik salasynda memlekettik aqparattyq júıe qurý kózdelýde, ol bıologııalyq táýekelderdi ýaqtyly basqarýǵa, bıoqaýipsizdik salasynda bir ortalyqtan esepke alý men monıtorıng júrgizýge, sondaı-aq patogendi bıoagentterdiń kóshýin qadaǵalaýǵa múmkindik beredi. Búginde Qazaqstan aýmaǵyndaǵy jáne shektes elderdegi asa qaýipti ınfektsııalarǵa qarsy kúres máselelerimen kópjyldyq damý tarıhy bar ǵylymı-zertteý ınstıtýttary, ulttyq ortalyqtar aınalysady. Bizdiń dóńgelek ústelimizge birneshe iri uıymdardyń basshylary qatysyp otyr, olar bizben osy saladaǵy eń baı tájirıbesimen bólisip, problemalar men olardy sheshý joldaryn talqylaıtyn bolady. Dóńgelek ústel otyrysynda Bıoqaýipsizdikti boljaýdyń ulttyq júıesi aıasynda monıtorıngti júzege asyrý, túrli bıologııalyq qaterler men den qoıý sharalarynyń aldyn alý, kadrlardy daıarlaý ári qaıta daıarlaý máselelerin jáne bıologııalyq qaýipsizdik salasyndaǵy basqa da ózekti máselelerdi talqylaý usynylady», - dedi depýtat.
Otyrysqa Májilis komıtetiniń depýtattary, jumys tobynyń músheleri, Densaýlyq saqtaý vıtse-mınıstri, QR Bas memlekettik sanıtarııalyq dárigeri Erlan Qııasov, QR Aýyl sharýashylyǵy vıtse-mınıstri Rústem Qurmanov, QR Bilim jáne ǵylym vıtse-mınıstri Qýanysh Erǵalıev qatysyp otyr. Sondaı-aq beınekonferentsbaılanys quraldary arqyly bıologııalyq, medıtsınalyq tehnologııalar, bıologııalyq qaýipsizdik, ekologııa, ǵylymı zertteýler salasyndaǵy qyzmetti júzege asyratyn ulttyq ortalyqtar men ınstıtýttardyń basshylary, múddeli mınıstrlikter men vedomstvolardyń, Eýrazııalyq medıtsınalyq qaýymdastyqtyń, Qazaqstan dezınfektsııalaýshylar odaǵynyń, «Atameken» Ulttyq kásipkerler palatasynyń ókilderi jáne basqa da sarapshylar qatysýda.
